Muhammed paıǵambar jazǵan hattyń kóshirmesi kórmege qoıyldy
ASTANA. KAZINFORM — Ortalyq Azııadaǵy ıslam kallıgrafııalyq sheberleri Astanada bas qosty.
Astanada alǵash ret «Qusnıhat: Ortalyq Azııadaǵy ıslam kallıgrafııasy» atty kórme ashyldy.
El astanasynda uıymdastyrylǵan kórmege grafıkalyq jazý óneri sheberleriniń 30-ǵa jýyq týyndysy qoıylǵan.
Elordaǵa jetkizilgen qundy jádigerler qatarynda ımam Al-Býharıdiń sııa saýyty, «Omar ıbn Hattabtyń qany tamǵan» Quran kitabynyń kóshirmesi jáne Muhammed (s.ǵ.s.) paıǵambardyń Vızantııa ımperatory men Bahreın koroline jazǵan hattarynyń kóshirmeleri bar. Ony ózbekstandyq kallıgraf Habıbolla Salıh jazyp shyqqan. Aıtýynsha, bul Quran kitabynyń 7-shi kóshirmesi. Eń alǵashqy jazbaǵa 3 jyldan astam ýaqytyn arnapty.
— Qalǵan altaýy eki jylǵa jeter-jetpes ýaqytta jazyldy, — deıdi ol.
Kallıgraf Habılolla Salıh atap ótkendeı, bul týyndylardy Ózbekstandaǵy aǵaıyn kórip, tamashalap júr.
— Osy Astanadaǵy kórmege arnaıy qazaq baýyrlarymyz kórsin dep alyp keldim. Endi qarap otyrsańyz, Paıǵambarymyzdyń jazǵan hatyn aınytpaı kóshirdim. Papırýstyń kólemderi de birdeı. Bul kóshirmeniń bir ǵana danasy. Basqa joq. Budan bólek, «Omardyń qany tamǵan Quran» dep atalady. Ony jeti ret kóshirip jazdym. Eń alǵashqysy uzaqtaý bolǵanymen, keıingilerinde qolym úırenip ketti. Negizi mundaı kórmelerdi jıi uıymdastyryp turý kerek dep oılaımyn. Sebebi, kallıgrafııa óneri umyt bolyp bara jatyr, — dedi Habılolla Salıh.
Budan bólek, kórmege Orta Azııadaǵy jazý ónerimen aınalysyp júrgen basqa da sheberlerdiń týyndylary da qoıylǵan. Negizgi maqsat — umyt bolǵan ónerdi nasıhattaý, kallıgrafııa jazýyn dáripteý.
Kallıgraf Orynbasar Asylbektiń sózinshe, «Qusnıhat: Ortalyq Azııadaǵy ıslam kallıgrafııasy» atty kórmege 5 memleket sheberleri qatysyp jatyr.
— Bul kórmege 5 memleket túrikmen, tájik, ózbek, qazaq, qyrǵyz elderinen kelgen sheberler qatysyp otyr. Ortalyq Azııa elderiniń kórmesi alǵash ret qolǵa alyndy. Ári bul Qazaqstanda bastaý aldy. Aldaǵy ýaqytta basqa qa kórshi memleketterge jetkiziletin bolady. Bul jerdegi eń basty nárse tek qana dindi emes, dinniń ónerin nasıhattaý. Sáýlet óneri bolady, kallıgrafııa óneri bolady, basqa da tustaryn tanyta bilý jáne de nasıhattaý, — dedi Orynbasar Asylbek.
Aıtpaqshy, kórme el táýelsizdik alǵaly alǵash ret uıymdastyrylyp otyr. Kórme úsh kúnge jalǵasady. Kirý tegin.
Buǵan deıin Belgııa astanasynda qazaqstandyq zergerdiń kórmesi ótip jatqanyn jazǵan edik.