Múgedektikti syrttaı belgileý kórsetkishi qaı óńirde tómen
ASTANA. KAZINFORM — EHÁQM Halyqty áleýmettik qorǵaý salasyndaǵy retteý jáne baqylaý komıtetiniń tóraǵasy Tólegen Ospanqulov múgedektikti syrttaı belgileý kórsetkishi tómen óńirlerdi atady.
— 2024 jylǵa arnalǵan «Amanat» partııasynyń Jol kartasyn iske asyrý aıasynda Eńbek jáne halyqty áleýmettik qorǵaý mınıstrliginiń aldyna múgedektikti belgileý boıynsha memlekettik qyzmetterdiń keminde 35 paıyzyn syrttaı proaktıvti formatta júrgizýdi qamtamasyz etý mindeti qoıyldy. 2024 jyldyń qorytyndysy boıynsha bul kórsetkish 37,4 paıyz. Belgilengen mejeden asyp tústik. Biz bul shek emes ekenin túsinemiz jáne jumysty qarqyndy túrde jalǵastyryp jatyrmyz, — dedi Tólegen Ospanqulov Ortalyq kommýnıkatsııalar qyzmetindegi brıfıngte.
Onyń dereginshe, 2025 jylǵy 1 shildedegi jaǵdaı boıynsha syrttaı proaktıvti formattaǵy saraptamalardyń úlesi 39,3 paıyzǵa jetti.
— Sonymen qatar aımaqtar arasyndaǵy aıtarlyqtaı aıyrmashylyqtarǵa nazar aýdaramyz. Atap aıtqanda, Ulytaý (25,1%), Mańǵystaý (26,7%), Túrkistan (37,0%), Jambyl (36,9%) jáne Atyraý (33,9%) oblystarynda bul kórsetkish respýblıkalyq ortasha deńgeıden tómen, — dedi ol.
Tólegen Ospanqulovtyń atap ótýinshe, bul óńirlerdegi tómen kórsetkishterdiń negizgi sebepteri mynalar:
— Dárigerlik-konsýltatsııalyq komıssııalar quramynda daıyn kadrlardyń jetispeýshiligi, bul jiberiletin medıtsınalyq aqparattyń durystyǵy men tolyqtyǵyna áser etedi;
— Jergilikti jerlerde halyq pen mamandardyń syrttaı proaktıvti formattyń múmkindikteri men artyqshylyqtary týraly jetkilikti aqparatpen qamtylmaýy;
— Medıtsınalyq aqparattyq júıeler arqyly derekterdi jiberý kezinde tehnıkalyq aqaýlar men kidiristerdiń oryn alýy, bul qujattardy sarapshylardyń jedel qaraýyn qıyndatady.
— Bul máselelerdi qosymsha jumys júrgizýge túrtki retinde qarastyramyz. Osyǵan baılanysty vedomstvoaralyq úılestirýdi kúsheıtip jatyrmyz. Óńirlerge ádistemelik jáne uıymdastyrýshylyq qoldaý kórsetip, mamandardy oqytyp, túsindirý jumystaryn júrgizip jatyrmyz, — Tólegen Ospanqulov.
Buǵan deıin múgedektikti belgileý tásilderin túbegeıli transformatsııalaý júzege asyrylyp jatqanyn jazǵan edik.