Múgedektigi bar adamdardy qoldaýǵa arnalǵan usynymdar toptamasy ázirlendi
ASTANA. KAZINFORM – Senat janyndaǵy Inklıýzııa jónindegi keńestiń kezekti otyrysy múgedektigi bar adamdardy medıtsınalyq, eńbek jáne áleýmettik ońaltý máselelerine arnaldy. Іs-shara barysynda senatorlar memlekettik organdardyń jáne sarapshylar qaýymdastyǵynyń ókilderimen birge atalǵan sanattaǵy azamattardy qoldaýǵa arnalǵan usynymdar toptamasyn ázirledi. Sondaı-aq olardy ary qaraı iske asyrý máselelerin talqylady.
Senat Tóraǵasy qatysýshylarǵa iltıpat bildirip, Memleket basshysy ár azamatqa óz áleýetin júzege asyrýǵa teń jaǵdaı jasalatyn ınklıýzıvti qoǵam qalyptastyrýǵa basa mán beretinin atap ótti. Qazirgi tańda elimizde bul baǵytta sheshýdi qajet etetin birqatar másele bar. Máselen, álemdik tájirıbede múgedektigi bar azamattardy jumysqa alýdyń jáne olardyń kásibı biliktiligin arttyrýdyń tıimdi ekeni dáleldengen. Soǵan qaramastan qazaqstandyq kompanııalar múmkindigi shekteýli jandardyń áleýetin paıdalanýǵa asa yntaly emes. Máýlen Áshimbaevtyń aıtýynsha, buǵan eńbek naryǵynyń erekshe qajettiligi bar azamattardyń suranystaryna beıimdelmeýi sebep bolýy múmkin.
«Bárine teń múmkindik beriletin ınklıýzıvti qoǵam qalyptastyrý – Prezıdentimiz Qasym-Jomart Kemeluly Toqaevtyń reformalarynyń mańyzdy basymdyqtarynyń biri. Birinshiden, bul – medıtsınalyq kómekke teń ári ádil qoljetimdilik, sapaly bilim, jumyspen qamtý jáne áleýmettik beıimdelýge arnalǵan múmkindikter. Bul rette áleýmettik ońaltýdy damytý da mańyzdy. Áleýmettik ońaltýdyń tıimdi tetikteriniń biri jumyspen qamtý ekeni anyq. Alaıda, búginde eńbekke qabiletti múgedektigi bar azamattardyń 36 paıyzy ǵana jumyspen qamtylǵan», - dedi Senat spıkeri.
Sonymen qatar otyrysta ınklıýzıvti bilim berý máselesi de talqylandy. Bul rette tek fızıkalyq turǵydaǵy kedergisiz orta qalyptastyrý jetkiliksiz ekeni aıtyldy. Inklıýzıvti bilim berý degenimiz – ıkemdi baǵdarlamalar, beıimdelgen tehnıkalyq jáne bilim berý quraldary, sondaı-aq pedagogterdiń tıisti quzyreti. Alaıda, óńirlerde áli de bolsa pedagog jáne reabılıtolog mamandar tapshy bolyp otyr.
Budan bólek, Palata Tóraǵasy múmkindigi shekteýli jandardy ońaltýda tek medıtsınalyq sheńbermen shektelýge bolmaıtynyn aıtty. Bul mańyzdy áleýmettik másele keshendi tásilder men múddeli taraptardyń júıeli is-qımylyn talap etedi.
«Jyl saıyn bilim berý salasynda erekshe oqý qajettiligi bar balalardyń sany artyp keledi. Ulttyq zertteýlerdiń málimetterine súıensek, pedagogterdiń 50 paıyzy mundaı jumys formatyna jáne ár balaǵa jeke oqý josparyn ázirleýge daıyn emes. Sondyqtan erekshe oqý qajettiligi bar balalarmen jumys isteı alatyn muǵalimder men tárbıeshiler daıarlaýdyń zamanaýı úlgisin ázirleý qajet. ıAǵnı, ońaltýdy keshendi protsess retinde damytý asa mańyzdy. Osy baǵytta Parlament Senaty óz tarapynan tıisti bastamalardy zańnamalyq turǵydan qoldaýǵa, qajetti zańdar ázirlep, qabyldaýǵa daıyn», - dedi Máýlen Áshimbaev.
Aıta keteıik, Senat janyndaǵy Inklıýzııa jónindegi keńes byltyrǵy qazan aıynda quryldy. Onyń basty mindeti – múmkindigi shekteýli azamattardy áleýmettik qoldaý jáne olardyń qoǵam ómirine, eńbekke belsendi aralasýyn qamtamasyz etý. Keńes alańynda buǵan deıin múgedektigi bar azamattardy jumyspen qamtý jáne ınklıýzıvti orta qurýda bıznestiń róli, sondaı-aq qarjylyq qyzmetter men ınfraqurylymǵa qoljetimdilik máseleleri talqylandy.
Keńestiń búgingi otyrysynda depýtattarmen birge Eńbek jáne halyqty áleýmettik qorǵaý mınıstri Svetlana Jaqypova, Densaýlyq saqtaý birinshi vıtse-mınıstri Tımýr Sultanǵazın, BUU-nyń múgedektik jáne ońaltý jónindegi halyqaralyq sarapshysy Oksana Vladımırova, Medıtsına ǵylymdarynyń doktory Sholpan Bólekbaeva, «Qamqorlyq qory» korporatıvtik qorynyń koordınatory Aınur Nurhojaeva, Áleýmettik ınnovatorlar qaýymdastyǵynyń prezıdenti Emın Askerov, «Shans» múgedekterdi ońaltý ortalyǵynyń tóraǵasy Vasılıı Shımanskıı jáne taǵy basqa mamandar sóz sóılep, qozǵalǵan taqyrypqa qatysty óz pikirleri men usynystaryn aıtty.
Otyrystyń qorytyndysy boıynsha Keńes aıtylǵan usynystardy zerdelep, arnaıy usynymdar ázirlep, olardy memlekettik organdarǵa joldaıdy. Sondaı-aq depýtattyq saýaldar arqyly da mańyzdy máseleler baqylaýda bolady. Munyń bári erekshe qajettiligi bar azamattardy medıtsınalyq, eńbek jáne áleýmettik ońaltýǵa oń yqpalyn tıgizbek. Budan basqa, Senat taıaý jyldarǵa arnalǵan respýblıkalyq bıýdjetti qaraǵan kezde de ońaltý máselelerin nazarda ustaıdy.
