Múgedekterge arnalǵan eki jańa memqyzmet iske qosyldy
Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady.
«Endi erekshe muqtajdyǵy bar adamdar eGov.kz arqyly úıde jáne medıtsınalyq-áleýmettik mekemelerde arnaýly áleýmettik qyzmet kórsetý qujattaryn resimdeýge ótinim bere alady. Buryn ol úshin Halyqqa qyzmet kórsetý ortalyqtaryna nemese jergilikti atqarýshy organǵa barý kerek bolatyn», - dep jazady vedomstvonyń baspasóz qyzmeti.
Joba Eńbek jáne halyqty áleýmettik qorǵaý mınıstrligi men «Ulttyq aqparattyq tehnologııalar» AQ birlesip iske asyrǵan.
«Múgedektigi bar adamdardyń ómir súrý sapasyn arttyrý úshin biz elektrondyq formatta kórsetiletin memlekettik qyzmetterdiń tizbesin birtindep keńeıtip jatyrmyz. Jańa tsıfrlyq sheshim erekshe muqtajdyǵy bar adamdarǵa úıde nemese medıtsınalyq-áleýmettik mekemelerde kútim kórsetý qujattaryn úıden shyqpaı-aq, onlaın rejımde resimdeýge múmkindik beredi. Paıdalanýshylar ózderine, balalaryna nemese qamqorlyǵyndaǵy balalarǵa qyzmet kórsetýge tapsyrys bere alady», – deıdi Eńbek jáne halyqty áleýmettik qorǵaý vıtse-mınıstri Erbol Ospanov.
Qujattardy resimdeýge ótinim berý úshin elektrondyq úkimet portalynda tıisti qyzmetti tańdap, suratylǵan aqparatty toltyrý, qujattardy tirkeý qaje. Osyndan keıin ETsQ nemese bir rettik parol arqyly suranymǵa qol qoıý qajet. Suranym sátti óńdelgen bolsa, ótinish joldanǵan memlekettik organnan jeke kabınetke habarlama keledi.
«Portalda qyzmet kórsetý merzimi úıde kútim alǵysy keletin paıdalanýshylar úshin 14 jumys kúnine, medıtsınalyq-áleýmettik mekemelerde qyzmet alǵysy keletinder úshin 17 jumys kúnine teń», - dep jazylǵan resmı málimette.
