Muǵalim mártebesin taǵy arttyrý úshin naqty sharalar qabyldaý qajet – depýtat

Muǵalimderdiń mártebesin ári qaraı qoldaý, arttyrý úshin naqty sharalar qabyldanýy qajet. Bul týraly Premer-Mınıstrdiń orynbasary Tamara Dúısenovaǵa depýtattyq saýal joldaǵan májilismen Juldyz Súleımenova aıtty, dep habarlaıdy Kazinform.

«Keshe Memleket basshysy Qasym-Jomart Kemeluly Toqaev: «Jan-jaqty josparlap, tııanaqty jasalǵan sharýa erte me, kesh pe, jemisin beretini sózsiz. Mysaly, biz sońǵy jyldary bilim berý salasyna basa mán berip kelemiz. Naqty sheshimder men sharalardyń arqasynda muǵalim mártebesi áldeqaıda kóterildi. Mekteptegi oryn tapshylyǵyn joıý úshin arnaıy baǵdarlama júzege asyrylýda. Bıyl júzge jýyq bilim oshaǵy boı kóterdi. Qazirgi tańda osyndaı aýqymdy jumystyń naqty nátıjesi bar. Atap aıtqanda, halyqaralyq PISA reıtıngi boıynsha Qazaqstandaǵy orta bilimniń sapasy edáýir artty. Basqa da salalarda oń ózgeris bar», – dep alqaly jıynda bilim máselesiniń nátıjelerine arnaıy toqtalǵan bolatyn.

Shyn mánisinde, PISA-2022 halyqaralyq zertteýleriniń nátıjelerine sáıkes, qazaqstandyq oqýshylar matematıkalyq saýattylyqtan 425 ball jınaqtap, Gretsııa, Rýmynııa, Birikken Arab Ámirlikteri oqýshylarymen teń tústi. Oqý saýattylyǵynan 386 ball jınaqtap, Malaızııa, Saýd Arabııasy oqýshylarymen teń bilim sapasyn kórsetti. Jaratylystaný baǵytynda zertteýdiń 2018 jylǵy nátıjelerimen salystyrǵanda, kórsetkishteri +26 balǵa joǵarylady. Bastysy, pandemııanyń saldarynan OESR elderiniń basym kópshiligi edáýir bilim sapasy boıynsha upaılaryn joǵaltsa, elimizde alǵa ilgerileý bar ekendigin, onyń ishinde matematıka 54 orynnan 46 orynǵa jáne jaratylystanýdan 69 orynnan 49 orynǵa kóterilgendigimizdi atap ótý qajet», - dedi depýtat Májlistiń jalpy otyrysynda.

Onyń atap ótýinshe, mundaı jaqsy dınamıkalyq kórsetkish Memdeket basshysynyń bilim berý salasyndaǵy keshendi, júıeli jáne aýqymdy reformalarynyń nátıjesinde múmkin boldy. Mysaly, «QR Pedagog mártebesi týraly» alǵash ret Zań qabyldandy. Ustazdardyń mártebesi zańmen bekitildi, pedagogterdi artyq tekserýlerden, qyzmetine tán emes jumystardan bosatty.

Sońǵy tórt jylda pedagogterdiń eńbekaqysy eki esege arttyryldy. Biliktilik sanattary úshin ústemaqy 30-dan 50 paıyzǵa deıin ulǵaıtyldy. Mektep bitirýshi eń úzdik túlekter «Pedagog» mamandyǵyn tańdaıtyn boldy, buǵan deıin pedagog mamandyǵyna oqýǵa túsýdiń ortasha baly 55 ball bolsa, bıyl ortasha ball 110 ballǵa deıin jetti. Bolashaq muǵalimderdiń shákirtaqysy basqa mamandyqtardan edáýir kóterildi.

Degenmen, Juldyz Súleımenova qol jetkizilgen nátıjelermen toqtamaý qajettigin aıtyp birqatar usynys jasady.

«Birinshi. Qol jetkizgen nátıjeni arttyrýǵa arnaıy sharalar jospary qabyldanyp, barlyq pedagogıkalyq qaýymdastyqpen talqylanýy shart. PISA zertteýleriniń nátıjelerin Oqý-aǵartý mınıstrligi tolyǵymen taldap, saraptama nátıjesinde «qatemen jumys» naqty ádistemelik usynystardy ázirlep, ony pedagogtarymyz ári qaraı jumystarynda paıdalanýy ózekti. PISA reıtıngisindegi aldynǵy qataryndaǵy Sıngapýr, Gonkong, Koreıanyń bilim mazmuny jáne bilim júıesi zerdelenip, ozyq tájirıbelerdi engizý múmkindikteri qarastyrylsyn», - dedi ol.

Májilis depýtaty ekinshiden, oqý saýattylyǵy boıynsha Úkimet kitaphana, kitap oqý, oqýǵa qushtar mektep degen jobalaryn keshendi negizde sapaly júzege asyrýǵa mán berý qajettigin atap ótti. Kitaphana jumysynyń jańa mazmuny men kitaphanashylar mártebesin arttyrý jumysy júzege asyrylýy qajettigin basa aıtty.

«Úshinshi. Muǵalimderdiń mártebesin ári qaraı qoldaýǵa, ári qaraı arttyrýǵa naqty sharalar qabyldanýy qajet. Pedagogtardyń kásibı damýy jáne biliktiligin arttyrý júıesin jetildirýdi qolǵa alý kezek kúttirmeıtin mindet dep oılaımyz. Tórtinshi. Damyǵan memleketter oqý baǵdarlamalarynyń mazmunyn 4-5 jylda ózgertip, óńdep, jetildirip turady. Bilim mazmunyn qazirgi jasandy ıntellekt zamanyn talaptaryna saı ózgertýge baılanysty memlekettik jalpyǵa mindetti bilim berý standarttaryna ózgeris engizý qaı deńgeıde? Kelesi oqý jylynda engizilip bastala ma? Naqty jospar bekitilýi tıis», - dedi depýtat.

Besinshiden, Juldyz Súleımenova oqýshylardyń oqý jetistikterin monıtorıngileýge – táýelsiz syrtqy baǵalaý retinde tıisti qarajat bólinip, onyń sapaly, ádil, ashyq ótýine mınıstrlik naqty sharalar qabyldaýy kezek kúttirmeıtin másele ekendigin tasa aıtty.

«Bilim sapasyn baǵalaýdyń Ulttyq júıesin qurý boıynsha keshendi sharalar qabyldanýy shart», - dedi ol.