Muǵalim men oqýshy dıalog quryp, kóp sóıleskeni abzal – ustaz

AQTÓBE. KAZINFORM – Y.Altynsarın atyndaǵy tósbelgi ıegeri Meıramkúl Sataeva 40 jylǵa jýyq ýaqyttan beri Yrǵyz aýdanynyń shalǵaı aýyly Quılysta fızıka páninen sabaq beredi. Talaı shákirt tárbıelegen ustaz aýyl men qala balasyn bólip, olardan aıyrmashylyq izdeý durys emes dep esepteıdi. Sonymen birge balalardyń sózdiń qoryn kóbeıtý úshin oqýshymen kóp sóılesken jón dep sanaıdy. Meıramkúl Sataeva Kazinform tilshisine uzaq jyldardaǵy tájirıbesi men ózi jetken jetistikteri týraly aıtyp berdi.

Yrǵyz aýdany Quılys orta mektebiniń fızıka pániniń muǵalimi bıyl zeınet jasyna tolady. Osydan 36 jyl buryn aýyldaǵy mektepke fızıka pániniń muǵalimi bolyp jumysqa ornalasyp, bir kezderi dırektordyń oqý isi, tárbıe isi jónindegi orynbasary da boldy. 

- Qyzylorda oblysy, Aral aýdanynda týyp-ósip, otbasy jaǵdaıyna baılanysty Yrǵyz aýdanynyń Táýip aýyldyq okrýgine kóship keldik. Aldymen Jaısańbaı aýylynda, keıin osy Quılysta oqyp, Almaty qalasyndaǵy Qazaq memlekettik qyzdar pedagogıkalyq ınstıtýtyna tústim. Ózim fılılog bolǵym kelgen, biraq ol kezde sol mamandyqqa suranys kóp bolyp, fızıkany tańdadym. Oqý bitirip, qolyma úzdik dıplom alǵan soń aldymen Jaısańbaı aýylyndaǵy mektepte bir jyl sabaq berdim. Keıin turmysqa shyǵyp, Quılys aýylyndaǵy mektepke ornalastym. Bir mektepte qyzmet etip júrgenime bıyl 36 jyl toldy,- dedi Y.Altynsarın atyndaǵy tósbelgi ıegeri Meıramkúl Sataeva. Fızıka pániniń muǵalimi zeınet jasyna jaqyndap qaldy.

Ol óz ornyn basatyn shákirtin kúni buryn daıyndap qoıǵan. Quılys orta mektebinde Nurlan Bıjaqyp jas maman bolyp oralyp, eńbek etip júr. 

Bes qyz ósirip, tárbıelegen ustaz bilim bárin teńestiredi dep sanaıdy. Tek oqýshylardy aýyl jáne qala balasy dep bólgendi qalamaıdy. 

- Qazirgi tańda qala balasy men aýyl balasynyń arasynda aıyrmashylyq bar dep kóp aıtyp jatyr. Men bul pikirmen onsha kelispeımin. Nege? Sebebi qala mektebindegi oqý protsesine qajettiniń bári qazir aýyldan tabylady. Biz áleýmettik jelimen jaqsy jumys isteı alamyz, túrli saıt arqyly jańa aqparatpen tanystyramyz, olımpıadaǵa balalardy daıyndap, qatystyramyz. Eldegi zamanaýı ádistemeni biz de sabaq berý kezinde qoldanamyz. Kóshke ilesedi, tipti aldynda júr dep aıta alamyn. Bizdiń mektepti bitirgen túlekterdiń kóbi joǵary oqý oryndaryn da úzdik bitirdi. Keıingi kezde aýylǵa kelip, jumys istep jatyr,- dedi Meıramkúl Sataeva. 

Ustazdyń aıtýynsha, aýylǵa qajetti kadr jaıyn aldyn ala oılastyrady. Mektep oqýshylaryn da sol salaǵa baǵyttap, aqyl-keńesin berip otyrady. 

- 40 jylǵa jýyq ýaqytta men talaı mamandy daıyndaýǵa úles qostym dep esepteımin. Medıtsına, bilim, aýyl sharýashylyǵy salasynda eńbek etip júrgen shákirtterimdi, jastardy maqtan tutamyn. Olar el úshin qyzmet atqaryp júr. Aýyl mektebi bolǵanymen Quılysta 10 kabınet jasaqtalǵan. Zerthanalyq jumystarǵa arnalǵan qural-jabdyǵymyz da bar. Ózim kabınette tolyqqandy jumys isteýge múmkindik bar dep esepteımin,- dedi ustaz.

Meıramkúl Sataeva bilim men tárbıeni qatar alyp júrý ustazdyń mindeti dep esepteıdi. Degenmen burynǵyǵa qaraǵanda qazir tárbıege basymdyq berilgen. 

- Balalar buryn uıań edi. Ózimizdiń oıymyzdy erkin aıta almaıtyn edik. Qazirgi kezde balalar erkin, oıyn ashyq aıta alady. Tehnıka men tehnologııanyń áseri bar dep bilemin osy tusta. Pedagogter buryn dástúrli sabaq berdi. Qazir ol qaldy. Jańashyldyqqa jol ashyp, barlyq múmkindikti paıdalanamyz. Degenmen baıandaý ádisi qalyp barady. Sol arqyly keri baılanys jasaýǵa bolatyn edi. Bul ne beredi? Bala oıyn aıtýǵa, erkin sóıleýge úırenedi. Sebebi balalardyń sózdik qory azaıǵan. Qalada qatty baıqalady. Aýylda da osy problema bar. Adamdarmen sóılesken kezde múdirip qalady. Muǵalim dıalog quryp, osyny tájirıbesine engizse eken,- dedi Meıramkúl Sataeva.

Aıta keteıik, Meıramkúl Sataeva 2017 jyly Y.Altynsarın atyndaǵy tósbelgi ıegeri atany. 2021 jyly bilim berý salasyn damytýǵa qosqan zor úlesi, óskeleń urpaqqa ónegeli tárbıe men sapaly bilim berýdegi joǵary jetistikteri men kásibı sheberligi úshin Bilim jáne ǵylym mınıstrliginiń alǵys hatyn aldy. Sonymen birge sol jyly «Jeltoqsan kóterilisine 35 jyl», «Jeltoqsan ardageri» tósbelgilerin taqty. 

Eske salsaq, Oqý-aǵartý mınıstrligi «Ustazdarǵa gúl syılaýǵa bola ma?» degen saýalǵa túsinik berdi.