Monrealda jeńilip qalǵan Rybakınanyń álemdik reıtıngi ózgerdi me

ASTANA. QazAqparat – Qazaqstannyń birinshi raketkasy Elena Rybakına Kanadanyń Monrealynda ótken WTA 1000 týrnırinen keıin álemdik reıtıngidegi ornyn saqtap qaldy, dep habarlaıdy QazAqparat «Shredınger sporty» Telegram-kanalyna silteme jasap.

Álemniń 4-raketkasy Elena Rybakına jeksenbi kúni túnde Monrealdaǵy týrnırdiń jartylaı fınalynda álemniń 18-raketkasy, reseılik Lıýdmıla Samsonovamen oınady.

Rybakına Lıýdmıla Samsonovaǵa qarsy birinshi sette 6:1 esebimen jeńgen edi, biraq keıin 1:6 jáne 2:6 esebimen ese jiberdi. Osylaısha, qazaqstandyq tennısshi týrnırdegi jarysyn aıaqtady. Al 24 jastaǵy Samsonova úshin bul mansabyndaǵy eń sátti týrnır jáne osy jeńisten keıin Reseıdiń alǵashqy raketkasy atandy. Ol 6 orynǵa kóterilip, álemniń 12-raketkasy boldy.

E.Rybakına álemdik reıtıngidegi 4-shi ornyn saqtap qaldy.