Mońǵolııada úsh qazaq sportshysy chempıon atandy - Sheteldegi qazaq tildi BAQ-qa sholý
Qazaqstannyń Túrkııaǵa kómir eksporty 5, 8 paıyzǵa artty - TRT
Ótken jyly Qazaqstannan Eýropaǵa 5, 2 mıllıon tonna kómir eksporttalǵan bolsa, aldyńǵy jyldary bul kórsetkish 4 mıllıon tonnadan aspaǵan. Qazaqstannyń Eýropaǵa kómir eksporty sońǵy 7 aıda rekordtyq kórsetkishke jetti.
Bul týraly osy aptada Túrkııa Radıo Televızııa portaly da habarlady.
Aıta keteıik, bıylǵy jeti aıda Qazaqstannyń Eýropa elderine kómir eksporty 6, 4 mln tonnany qurady. Osylaısha kómir eksporty rekordtyq kórsetkishke jetti. Onyń aqshalaı quny 371, 8 mıllıon dollardy qurady.
Bıyl qazaq kómirin eń kóp satyp alǵan Eýropadaǵy elder qatarynda Shveıtsarııa, Polsha jáne Belgııa boldy. Sonymen qatar Bolgarııa, Anglııa, Rýmynııa jáne Latvııa da atalǵan tizimde bar.
Túrkııalyq BAQ-tyń keltirgen deregine súıensek, Qazaqstan Túrkııaǵa da kómir eksporttaıdy. Aǵymdaǵy jyldyń 7 aıynda Túrkııaǵa 5, 4 mıllıon dollarǵa 104, 1 myń tonna kómir eksporttalǵan. Tas kómir, qońyr kómir jáne kómir kontsentraty óndirisi ótken jyldyń sáıkes kezeńimen salystyrǵanda 5, 8 paıyzǵa artty.
Jalpy Qazaqstannyń kómir eksporty birinshi jartyjyldyqta ótken jyldyń sáıkes kezeńimen salystyrǵanda 21 paıyzǵa artyp, eksporttyń aqshalaı quny eki esege ósip, 457, 4 mln dollarǵa jetti.
Qazaqstannan Eýropaǵa bıdaı eksporty artty - Parstoday
Qazaqstan bıdaıynyń Eýropaǵa eksporty artty. Qazaqstan – álemdegi eń iri 10 astyq eksporttaýshy eldiń biri. Bul el álemniń túrli elderine astyq eksporttaıdy.
Bul týraly osy aptada Irannyń Parstoday aqparat agenttigi habarlaǵan bolatyn.
Atalǵan aqparat agenttiginiń málimetinshe, bıyl qańtar-shilde aılarynda Eýroodaqqa múshe elderge qazaqstandyq bıdaıdyń eksporty eki esege artqan. Osy aralyqta Qazaqstan Eýropaǵa 183,3 myń tonna bıdaı eksporttady. Bul ótken jyldyń uqsas merzimimen salystyrǵanda 2,1 ese artyq.
«Eýropa elderine bıdaı eksportynyń qarjy kólemi 3,1 ese, ıaǵnı 25,1-den 77 mln dollarǵa deıin ósti», dep túıindeıdi Parstoday.
Sondaı-aq Parstoday osy aptada «11 myńnan astam qazaq eline oraldy» degen aqpartty da jarııalady.
Esterińizde bolsa, bul týraly Qazaqstannyń Eńbek jáne halyqty áleýmettik qorǵaý mınıstrligi byltyr 11 myńnan astam qazaqstandyq ımmıgrant eline oralǵanyn habarlaǵan bolaty.
Aıta keteıik, 1991 jyldan beri Qazaqstanǵa shetelden bir mıllıon 99 myńnan astam qazaq azamaty oraldy. Qazaqstanǵa oralǵan qazaqtardyń jartysynan kóbi 69,6% Ózbekstannan, 10,5% Qytaıdan, 7,1% Túri k menstannan, 4,6% Mońǵolııadan jáne 8,3% basqa elderden kelgen. Atamekenine oralǵan qazaqtar negizinen Almaty (30,8 paıyz), Mańǵystaý (17,2 paıyz), Túrkistan (9,4 paıyz), Jambyl (6,8 paıyz) sııaqty oblystarda, sondaı-aq Shymkent (7,6 paıyz), Nur-Sultan (7,5 paıyz) jáne Almaty (5,9 paıyz) qalalarynda ornalasty.
Mońǵolııada úsh qazaq sportshysy chempıon atandy - Kaznews
Mońǵolııanyń búkil halyqtyq XV spartakııadasy aıasynda ótken sambo kúresi boıynsha saıysta Baıan-Ólgıı aımaǵynyń sportshysy Serik Berdimuratuly chempıon atandy. Aıta keteıik, Serik Berdimuratuly atalmysh spartakıada oıyndarynda +98 keli salmaq dárejesinde beldesken bolatyn. Sondaı-aq, paýerlıftıng boıynsha 120 keli salmaq dárejesinde synǵa túsken Saıfolla Tileýberdiuly atty sportshy chempıondyq ataqqa qol jetkizgen.
Bul týraly osy aptada «Kaznews» aqparattyq portaly habarlaǵan bolatyn.
Sonymen qatar osy aptada mońǵolııalyq Nurtilek Serikbaıuly esimdi jas balýan jasóspirimder arasyndaǵy saıysta jeńimpaz atandy.
Mońǵolııalyq BAQ-tyń dereginshe, Hovd aımaǵynyń týmasy, mońǵoldyń ulttyq kúresinen «Ýlsyn avarga» ıaǵnı memlekettik chempıon ataǵyn alǵan O.Hangaıdy ulyqtaýǵa arnalǵan saltanatty rásim bolyp ótti. Atalǵan saltanatty sharaǵa arnalǵan palýandar saıysynda 128 balýan kúsh synasyp, Hovd aımaǵynyń palýany B.Púrevsaıhan (ý.z) birinshi oryn, Baıanhongor aımaǵynyń palýany N.Zolboo (ý.h) ekinshi oryn ıelendi. Baıan-Ólgıı aımaǵynyń palýany Serik Berdimuratuly men Óvórhangaı aımaǵynyń palýany B.Tsedensodnom (ý.h) úzdik úshtikti qanaǵat tutqan.
Al, jasóspirimder arasyndaǵy saıysta Baıan-Ólgıı aımaǵynyń palýany Nurtilek Serikbaıuly jeńimpaz atanǵan. Ol fınalda Ývs aımaǵynyń palýany N.Maıdardan aılasyn asyrǵan bolatyn.
Jas ánishi Qazaqstan men Qytaı arasyna ónerimen rýhanı kópir bolǵysy keledi - «Halyq gazeti»
«Jibek joly bulty» atty qytaısha án baıqaýy qazaq jáne qytaı tilderin biletin talantty ánshiler úshin sahnada óner kórsetip, qalyń tyńdarmanǵa ózin kórsete alatyn taǵy bir múmkindikke aınaldy. Qytaı Halyq respýblıkasynyń Qazaqstan Respýblıkasyndaǵy Elshiligi uıymdastyrǵan «Jibek joly bulty» qytaısha án baıqaýynda 2021 jyly eresekter arasynda bas báıgeni talantty jastardyń biri Alınur Alıbıuly enshilegen edi .
Bul týraly osy aptada Qytaıdyń «Halyq gazeti» aqparattyq portaly habarlaǵan bolatyn.
Atalǵan BAQ-tyń málimetinshe, Qazaqstannyń Taraz qalasynda týǵan Alınur Alıbıuly qazaq, qytaı, orys, aǵylshyn tilderin jaqsy biledi. Alınur Qytaıdyń Shanhaı qalasyndaǵy Tonjı ýnıversıtetinde Konfýtsıı ınstıtýtynyń stıpendııasymen bakalavrıatty aıaqtap, qazir Shanhaı ýnıversıtetinde «Bir beldeý bir jol» grantymen aspırantýrada oqyp júr.
Bala kúninen qytaı tiline qyzyqqan ol Úrimji qalasyna baryp, qytaı tilin úırenýdi bastaǵan. Alǵashynda til úırený qıyn bolǵanymen, til meńgerýge talapty jas az ýaqytta qytaı tilin ıegere bastaǵan.
Qytaıda qazaqstandyq ánshi jigit dep tanyla bastaǵan Alınur buǵan deıin Qytaıdyń Qazaqstandaǵy elshiligi uıymdastyrǵan «Jibek joly bulty», «Qytaıdyń jańa áni», «Qytaıdy jyrlaıyq», «Tonjı ýnıversıtetiniń on juldyzy» syndy án baıqaýlaryna qatysqan eken.
«Bir til bilseń bir adamsyń» degen ustanymdaǵy Alınur qytaı tilin úırený oǵan taǵy da bir jańa serpin syılaǵanyn aıtady. Ol negizinen atalǵan eldiń barlyq qalalaryn aralap kórgen, solardyń ishinde stýdenttik kúnderi ótken Shanhaıdy qatty unatady. Bolashaqta múmkindikterge toly Shanhaıda jumys istegisi keledi eken.
Qytaılyq BAQ-tyń keltirgen deregine súıensek, jas ánshi Qytaı men Qazaqstan arasyna ánmen rýhanı kópir ornatqan Dımash Qudaıbergennen keıin taǵy da ónerimen eki el halqynyń arasyna kópir bolǵysy keledi.
Tashkentte «Qazaqstan kınosy kúnderi» bastaldy - «ÓzA»
«Jibek joly jaýhary» atty XIV Tashkent halyqaralyq kınofestıvali aıasynda Qazaqstan kınosy kúnderi bastaldy. 13-18 qyrkúıek kúnderi aralyǵynda ótetin halyqaralyq kınofestıval aıasynda uıymdastyrylǵan ataýly shara barysynda qazaqstandyq rejısser Aldııar Baırakımovtyń «Paralımpıadashy» atty kartınasy kórsetildi, dep habarlaıdy «ÓzA» aqparattyq agenttigi.
Ózbekstandyq BAQ-tyń keltirgen derekterge súıensek, atalǵan fılm shynaıy oqıǵa negizinde túsirilgen. Onda jas ári myqty shańǵyshy Maqsat Qýanyshbaev esimdi jigittiń qysqy Olımpıada oıyndaryna barar aldynda jol apatyna ushyrap, bir aıaǵynan aırylady.
Osy oqıǵadan keıin ol ishkilikke berilip, sporttan ketedi. Biraq ol bir kúni Paralımpıada oıyndaryna daıyndalyp jatqan múmkindigi shekteýli sportshylardyń jattyǵýyna qatysyp múgedektigine qaramaı jaqsy nátıje kórsetedi. Myna jaǵdaıdy baıqaǵan jattyqtyrýshy komandaǵa qosylýyn suraıdy.
Maqsat kelisip, 2018 jyly Phenchhanda ótken qysqy Olımpıada oıyndarynda sprıntten 1500 metr qashyqtyqqa júgirýden birinshi kelip chempıon atanady.
Basty róldi (Maqsat Qýanyshbaev) jas ári talantty akter Askar Ilıasov somdaǵan.
Aıta keteıik, XIV Tashkent halyqaralyq kınofestıvaline álemniń 40-tan astam elinen 500-ge jýyq kıno óneriniń maıtalmandary qatysýy kózdelgen. Olardyń qatarynda Takesı Kıtano, Lıýk Besson, Armand Assante, Sergeı Bezrýkov, Tımýr Bekmambetov, Býrak Ozchıvıt, Ýmesh Mehra, Adaı Abeldınov sekildi kóptegen tanymal kıno juldyzdary bar.
Sondaı-aq, halyqaralyq kıno kúnderi aıasynda 150-den astam kórkem týyndy, qysqa metrajdy jáne qujatty fılmder kórsetiledi.
Qytaı halyqaralyq jármeńkesinde «ushatyn kólikti» tanystyrdy - «Halyq gazeti»
Haınan provıntsııasynyń Haıkoý qalasynda ekinshi Qytaı halyqaralyq tutyný taýarlary jármeńkesi ótti. Bul jármeńke – jahandyq tutyný ónimderin kórsetýge jáne saýda jasaýǵa arnalǵan qoǵamdyq qyzmet kórsetý alańy. Bıylǵy jármeńkede jańadan qurylǵan 5000 sharshy metrlik otandyq ónimder qoıylǵan býtık zaly Qytaıdyń tanymal brendterin, sondaı-aq tehnologııa jáne mádenı shyǵarmashylyq sıpattaǵy ártúrli tutyný taýarlaryn toptastyrǵan, dep habarlaıdy Qytaıdyń «Halyq gazeti» aqparat agenttigi.
Atalǵan aqparat agenttigi Qytaıdyń otandyq ónimder saraıyndaǵy «Ushatyn kólikpen» tanystyrdy. Xiaopeng Huitian ushatyn kóligi kómirtekti talshyqtan jasalǵan, salmaǵy shamamen 500 kg, ishine eki adam otyra alady, ushýdyń maksımaldy jyldamdyǵy 130 km/saǵ jáne 1000 metrge deıin usha alady. Bul kólik jappaı óndirilip, 2024 jyly iske qosylady dep kútilýde.
