Mońǵolııada qazaq kınosynyń kúnderi ótip jatyr
Eki kún boıy qazaqstandyq fılmder kórsetiletin is-shara Qazaqstan Respýblıkasynyń Tuńǵysh Prezıdenti kúnine arnalǵan jáne «Rýhanı jańǵyrý» memlekettik baǵdarlamasy aıasynda ótip jatyr.
Kınokórsetilimdi Qazaqstannyń Mońǵolııadaǵy Elshiligi «Sháken Aımanov atyndaǵy «Qazaqfılm» AQ birlesip uıymdastyrýda, dep habarlaıdy QazAqparat.
Qazaq kınosynyń kúnderi 28 qarashada qazaqstandyq rejısser Rústem Ábdirashtyń túsirgen «Balalyq shaǵymnyń aspany» kórkem fılminiń kórsetilimimen bastaldy. Fılmde ult kóshbasshysy N.Nazarbaevtyń tulǵasy men mineziniń qalyptasýy, onyń alǵashqy sátsizdikteri men jeńisteri, oryndalǵan úmitteri men armandary týraly baıandalady.
Sonymen qatar, is-shara aıasynda Mońǵolııa astanasynyń kórermenderi Ermek Tursynovtyń «Shyraqshy» jáne «Shal», Rústem Ábdirashtyń «Qazaq handyǵy: Altyn taq» jáne Aqan Sataevtyń «Anaǵa aparar jol» sııaqty kınotýyndylaryn tamashalaıdy.
Jobanyń basty maqsaty qazaq halqynyń tarıhy men dástúrin tanystyrý, mádenıet salasyndaǵy ekijaqty qatynasty nyǵaıtý, sondaı-aq Mońǵol kórermenderin Qazaqstannyń qazirgi kınomatografııasymen tanystyrý bolyp tabylady.
