Mońǵolııa dıplomattary Názir Tórequlov atyndaǵy medalmen marapattaldy

BEIJІŃ-ULAN-BATYR. QazAqparat - Ulanbatyrda Qazaqstan Respýblıkasy men Mońǵolııa arasyndaǵy dıplomatııalyq qatynastardyń ornaǵanyna 25 jyl tolýyna arnalǵan fotokórme ótti, dep habarlady Qytaıdaǵy «QazAqparat» HAA tilshisi.

Kórmeniń ashylýyna Mońǵolııa syrtqy ister mınıstriniń orynbasary Batmýnhıın Battsetseg, Uly memlekettik hýral depýtattary, jergilikti bılik organdary, dıplomatııalyq korpýs ókilderi men qazaq dıasporasy, Mońǵolııa qoǵam qaıratkerleri qatysty.

Sóılegen sózinde Mońǵolııa  syrtqy ister mınıstriniń orynbasary Batmýnhıın Battsetseg fotokórme eki el arasyndaǵy dostastyq qatynastardy nyǵaıtý jáne tereńdetýge yqpal etip, Qazaqstan men Mońǵolııa arasyndaǵy tatý kórshilik baǵyttyń kórinisi bolyp tabylatynyn atap ótti.

Mońǵolııadaǵy Qazaqstan Elshisi Qabylbek Qoblandın  burynǵy Qazaqstandaǵy Mońǵolııa elshisin elder arasyndaǵy ekijaqty qatynastardy damytýǵa qosqan úlesi úshin  birinshi qazaq dıplomaty - Názir  Tórequlov  atyndaǵy medalmen marapattady.

Eske salsaq, Názir Tórequlov (1893-1937) - alǵashqy qazaq dıplomaty, kórnekti qoǵam qaıratkeri. Tórequlov atyndaǵy «Qazaqstannyń syrtqy saıasatyn damytýǵa qosqan úlesi úshin» medali  - QR SІM vedomstvolyq nagradasy 2003 jyly belgilengen.