Mobıldi aýdarym ne úshin tekseriledi
1 qańtardan bastap kóptegen otandyq kásipkerler mobıldi aýdarym arqyly tólem alýdy toqtatyp, tek qolma-qol aqsha qabyldaı bastady. Osyǵan baılanysty qazaqstandyqtar taýarlar men qyzmet aqysyn tóleý úshin bankomattan jappaı qolma-qol aqsha ala bastaǵan. Óıtkeni salyq organdary salyq tóleýden jaltarǵan kásipkerlerdi anyqtaý úshin qazir qazaqstandyqtardyń mobıldi aýdarymdaryn baqylaýǵa kiristi. QR Qarjy mınıstrliginiń Memlekettik kirister komıteti mobıldi aýdarymdardy qadaǵalaý nelikten engizilip jatqanyn jáne salyq baqylaýyna kimder tartylatynyn túsindirdi, dep habarlaıdy Kazinform.
Komıtet málimetinshe, mobıldi aýdarymdardy tekserý zańsyz kásipkerlik qyzmetti kóleńkeden shyǵarýǵa baǵyttalǵan. Keıbir kásipkerler satylǵan taýarlar nemese qyzmetter úshin tólemdi mobıldi aýdarymdar arqyly alady. Alaıda bul aýdarymdar kassalyq apparattardy, POS-termınaldardy jáne QR-kodtardy qoldanbaı júrgiziledi. Tıisinshe, chek berilmeıdi jáne tutynýshylardyń quqyǵy buzylady.
Aıta ketý kerek, memleket barlyq mobıldi aýdarmany teksermeıdi.
Tek ártúrli tulǵalardan úsh aı qatarynan aı saıyn 100 nemese odan da kóp mobıldi aýdarymdar alǵan tulǵalar ǵana, ıaǵnı, kásipkerlik qyzmettiń belgileri baıqalǵan jaǵdaıda tekserý júrgiziledi.
Týystar men dostarǵa aqsha aýdarýǵa bola ma?
Jeke tulǵalar burynǵydaı ózderiniń jeke maqsattary úshin týystaryna, dostaryna, ata-analaryna, balalaryna jáne basqa da ómirlik jaǵdaılarǵa baılanysty mobıldi aýdarymdar jasaı jáne qabyldaı alady. Buǵan qatysty eshqandaı shekteý joq.
Keıbir kásipkerler tek qolma-qol aqshamen tólem jasaýdy talap ete bastady. Bul qanshalyqty zańdy?
«Tólemder jáne tólem júıeleri týraly» Qazaqstan Respýblıkasy Zańynyń normalaryna sáıkes túrli tólem tásilderi qarastyrylǵan – bank kartasymen, QR tólemimen nemese qolma-qol aqshamen (25-bap).
Qolma-qol aqshasyz tólemderdi qabyldaýdan bas tartý zańsyz jáne tutynýshylardyń quqyǵyn buzady.
Kásipkerlerdiń tólem kartochkalaryn paıdalana otyryp tólemderdi qabyldaýdan bas tartqany úshin birinshi ret ákimshilik jaýapkershilikke tartylyp, eskertý jasalady, al qaıtalap buzǵan jaǵdaıda – 147 680 teńge (40 AEK) kóleminde aıyppul salynady (ÁQBtK-niń 194-baby).
Eger kásipker qolma-qol aqshasyz tólem qabyldaýdan bas tartsa, qaıda júginýge bolady?
Qolma-qol aqshasyz tólemderdi qabyldaýdan bas tartý faktileri týraly turǵylyqty jeri boıynsha memlekettik kiris organdaryna júginý qajet.
Taksı júrgizýshilerine ne isteýi kerek? Olar kassalyq apparatty ózderimen birge alyp júre almaıdy ǵoı.
Jeke tasymaldaýshylar jeke kásipker retinde tirkelýi kerek. Muny «e-Salyq Business», «Egov Mobile» jáne keıbir ekinshi deńgeıdegi bankterdiń mobıldi qosymshalary («Halyq bank», «Kaspi bank», «BankCenterCredit») arqyly jasaýǵa bolady.
Bul rette qolma-qol aqshasyz tólemderdi qabyldaý úshin onlaın rejıminde kásipkerlik bank shotyn ashýǵa bolady, sol jerge kórsetilgen qyzmetter úshin tólemder túsedi. Ol úshin sizge tek smartfon qajet. Kassalyq apparattar men POS-termınaldardy alyp júrýdiń qajeti joq.
Bul bastama kásipkerlerdiń «kóleńkege» ketýine ákelip soqpaı ma?
Qazirgi tańda salyqtyq mindettemelerdi adal oryndaý áldeqaıda tıimdi.
Búginde bıznes júrgizýge jáne ony damytýǵa qolaıly jaǵdaı jasalǵan. Salyq rejımderiniń tártibi jeńildetildi – salyq mólsherlemeleri qyzmet túrine baılanysty tek 1-4% bolady.
Eger mundaı jaǵdaıda kásipker mobıldi aýdarymdar qabyldasa, onda ol qazirdiń ózinde «kóleńkede» qalyp, salyq baqylaýyna túsedi.
Bul rette mobıldi aýdarymdardy tekserý adal salyq tóleýshilerge áser etpeıdi.
Osylaısha, ádildik jáne mindetti salyq salý prıntsıpteri júzege asyrylady. ıAǵnı, barlyq salyq tóleýshiler teń bolýy jáne alynǵan tabystan salyq tóleýi tıis.
