Mobıldi aýdarym: Tutynýshylardan qansha shaǵym tústi

Jyl basynan beri Saýda jáne ıntegratsııa mınıstrligi Tutynýshylardyń quqyqtaryn qorǵaý komıtetine kásipkerlerdiń mobıldi aýdarymdar arqyly tólem jasaýdan bas tartýyna qatysty 10 ótinish túsken, dep habarlaıdy Kazinform. 

«Tutynýshylar negizinen satýshylardyń tólemdi tek qolma-qol esep aıyrysý arqyly júzege asyrý talaptaryna, sondaı-aq POS-termınaldardyń (tólem kartalaryn tóleý úshin qabyldaýǵa arnalǵan elektrondyq baǵdarlamalyq-tehnıkalyq qurylǵy) bolmaýyna shaǵymdanady. «Tólemder jáne tólem júıeleri týraly» Qazaqstan Respýblıkasy Zańynyń 25-babyna sáıkes tutynýshylardyń qolma-qol aqshasyz esep aıyrysý boıynsha tólem ádisin tańdaý múmkindigi bar (bank kartasy arqyly, QR kod arqyly tóleý)», - dep jazylǵan mınıstrliktiń redaktsııa saýalyna joldaǵan jaýabynda. 

Vedomstvodaǵylar mobıldi tólemniń zańdy tásilderimen aqsha qabyldaýdan bas tartý áreketi qaı zańnyń qaı babyna qaıshy ekenin de aıtqan.

«Ákimshilik quqyq buzýshylyq týraly» Kodekstiń 720-baby boıynsha, memlekettik kiris organdary aýdarymdardy qabyldaýǵa mindetti dara kásipkerdiń nemese zańdy tulǵanyń tólem kartochkalary arqyly tólem qabyldaýdan bas tartýyn osy kodekstiń 194-baby boıynsha qaraıdy. Joǵaryda aıtylǵandardy eskere otyryp, barlyq kelip túsken ótinishter quzyreti boıynsha QR Qarjy mınıstrliginiń Memlekettik kirister komıtetine Ákimshilik rásimdik-protsestik kodeksiniń 65-baby 1-tarmaǵyna sáıkes jan-jaqty qarastyrý jáne tıisti sharalar qabyldaý úshin ári qaraı joldandy», - delingen mınıstrlik málimetinde.