Mindetti tańbalaý kóleńkeli aınalymdy azaıta ala ma

ASTANA. KAZINFORM – Qarjy mınıstrligi Memlekettik kirister komıtetiniń aktsızderdi ákimshilendirý basqarmasynyń basshysy Ablaı Mekebaev tańbalaý júıesiniń negizgi tetikteri týraly aıtty. 

Onyń málimdeýinshe, tańbalaý júıesi Eýrazııalyq ekonomıkalyq odaq aıasyndaǵy kelisimnen bastaý alady. Atalǵan kelisimge qatysýshy memleketter taýarlardy mindetti tańbalaýdy engizý jóninde mindetteme alǵan.

Qazaqstanda ýákiletti organ — Saýda jáne ıntegratsııa mınıstrligi. Al salalyq memlekettik organdar arasynda Qarjy mınıstrliginiń Memlekettik kirister komıteti aktsızdeletin ónimderdi tańbalaý boıynsha jaýapty organ bolyp aıqyndalǵan.

— Tańbalaý — naryqty kóleńkeli aınalymnan shyǵarý, tutynýshylardy qorǵaý jáne ónimniń tsıfrlyq qadaǵalanýyn qamtamasyz etý maqsatynda qoldanylatyn qural. Negizgi qaǵıdatqa sáıkes, óndirýshi nemese ımporttaýshy ónimdi tańbalaıdy, odan ári jetkizý tizbegindegi qatysýshylar ónim kólemin tirkep, bólshek saýdaǵa deıin ótkizedi. Osylaısha, ónimniń óndirýshiden bastap sońǵy tutynýshyǵa deıingi qozǵalysy tolyq qadaǵalanady, — dep túsindiri spıker.

Sonymen qatar ol óz sózinde tańbalaý júıesin engizý aktsızder men jalpy salyq túsimderiniń artýyna yqpal etedi, sondaı-aq zańsyz ónimderdi anyqtaýǵa múmkindik beredi. Tańbalanýǵa jatatyn ónimdi tańbasyz aınalymǵa shyǵarǵany úshin ákimshilik jaýapkershilik kózdelgen. Mundaı ónim tárkilenedi. Atalǵan jaýapkershilik Ákimshilik quqyq buzýshylyq týraly kodekste bekitilgen dep atap ótti.

Buǵan deıin Qazaqstan Ortalyq Azııada dári-dármekti tańbalaýdyń tolyq tsıklin bastaǵan jalǵyz el bolǵanyn jazǵanbyz.