MMA: Qytaıdaǵy qandasymyz Qýanysh Óskenbekuly qarsylasyn nokaýtqa jiberdi
ASTANA.QazAqparat - MMA boıynsha sport sheberi, Qytaıdaǵy qandasymyz Qýanysh Óskenbekuly osy elde ótken aralas jekpe-jekte besinshi jeńisine qol jetkizdi, dep habarlaıdy QazAqparat tilshisi.
Qandasymyz japondyq Tomomitsu Hinuma-men aıqasta qarsylasyn ekinshi raýndta sulatyp saldy.
Qýanysh birinshi raýnda óziniń basymdylyǵyn kórsetip, qarsylasy bir ret nokdaýn alyp qaldy. Ekinshi raýndtyń 2 mınýtynda Qýanysh qarsylasyna aýyr soqqy baǵyttap, jekpe-jekti ýaqytynan buryn aıaqtady.
20 jastaǵy qandasymyz qytaıdyń Chjenchjoý qalasyndaǵy kásibı MMA klýby quramynda jattyǵady, laqap aty «Optimus Prime». Bala kezinen kúrespen aınalysyp, birneshe márte grek-rım kúresinen Shyńjań-Uıǵyr avtonomııalyq ólkesiniń chempıony atanǵan. Aralas jekpe-jektegi alǵashqy aıqasy týra bir jyl buryn, ıaǵnı 23 shildede japondyq Isamu Yamaguchi-ben bolǵan edi. Bul kúnde Qýanysh 5 kezdesý ótkizip, barlyǵynda ýaqytynan buryn jeńiske jetken.
Aıta keterligi, Qýanyshtyń kelesi jekpe-jegi 22 shildede brazılııalyq Marselo Kostamen bolady.
