Mıra Shúıinshálıevanyń «Ar azaby» oqyrmanǵa jol tartty
Almatydaǵy «Úsh qııan» baspasynan 1 myń dana taralymmen basylyp shyqqan bul kitapqa qalamgerdiń pesa, hıkaıa, áńgimeleri toptastyrylǵan. Osyǵan deıingi jınaqtarynda jazýshynyń prozalyq shyǵarmalary basylyp kelse, avtor bul joly dramatýrgııa janrynda qalam siltepti.
«Ar azaby» atty pesasyna ótkinshi ómirdegi adamdar arasyndaǵy aıtys-tartys, satqyndyq pen jalǵandyq, ar azabynan eshkimniń de qutylmaıtyndyǵy, bireýge jasaǵan qııanat túbinde aldyńnan shyǵatyny arqaý bolǵan. ıAǵnı adaldyqtyń aq jolynan taımaýdyń qadir-qasıetin uǵyndyra túsedi. «Aqynnyń taǵdyry» atty muńly dramada mahabbat dertine ushyraǵan basty keıipkerdiń jan saraıy ashylǵandaı. Jınaqqa engen «Sińlimniń súıgeni» hıkaıasy men «Erke» kúshik», «Kezbelikten qutylǵan kún» atty áńgimeleri de - kóterer júgi, aıtary bar dúnıeler. Sonyń ishinde «Erke» kúshik» - ótken jyly «Rahymjan Otarbaevtyń mádenıet qory» jarııalaǵan respýblıkalyq baıqaýda úzdik shyqqan áńgimelerdiń biri.
Proza janrynda qalam terbep júrgen qazaq qyzdarynyń biri Mıra Shúıinshálıevanyń buǵan deıin «Mahabbat baǵy» (2003 jyl), «Shúberek qýyrshaq» (2006 jyl), «Júrektegi qupııa» (2009 jyl), «Ókinish» (2014 jyl) atty kitaptary baspa júzin kórgen bolatyn. Kezinde onyń «Shúberek qýyrshaq» jınaǵynyń alǵysózin belgili qalamger, Memlekettik syılyqtyń laýreaty Dýlat Isabekov jazyp, batasyn bergen edi.
Aıta keteıik, Mıra Hamzaqyzynyń týyndylary men shyǵarmalary týraly maqala-pikirler respýblıkalyq «Egemen Qazaqstan», «Qazaq ádebıeti», «Juldyz», «Ana tili», «Aıqyn», «Qazaqstan áıelderi», «Jalyn», «Úrker» jáne basqa basylymdarda jarııalanyp keledi.
