Mınıstrlik qus fabrıkalaryndaǵy kemshilikterdi atady

NUR-SULTAN. QazAqparat – QR AShM Veterınarlyq baqylaý jáne qadaǵalaý komıteti tóraǵasynyń mindetin atqarýshy Tursyn Qabdoldanov qus ósiretin fabrıkalardaǵy tekserý nátıjesin aıtty., dep habarlaıdy QazAqparat tilshisi.

«Qazaqstan Respýblıkasynda 64 qus fabrıkasy jumys isteıdi, onyń ishinde jumyrtqa baǵytyndaǵy 35 kásiporny bar. Onyń shinde Qostanaı oblysynda bir jáne Soltústik Qazaqstan oblystarynda da bir qus fabrıkasynda qus tumaýy baıqaldy. Tekserý júrgizý kezinde jumys toby qus fabrıkalarynyń ıeleri veterınarııalyq-sanıtarııalyq talaptardy saqtamaıtynyn, jabaıy ári jyl qustarynyń qus fabrıkalarynyń aýmaǵynda bar ekendigi, mal dárigeri biliktiliginiń sáıkessizdigi jaǵdaılaryn anyqtady», - dedi Tursyn Qabdoldanov Ortalyq kommýnıkatsııalar qyzmetinde.

Osy oraıda ol qus sharýashylyǵy nysany qyzmetiniń veterınarııalyq-sanıtarııalyq talaptarǵa sáıkestigi bıologııalyq qaýipsizdiktiń kepili ekenin atap ótti.

Sonymen qatar qus tumaýynan kelgen shyǵyndy óteý máselesine toqtaldy.

«Jalpy, qus shyǵynyn óteý Statıstıka komıtetiniń bergen árbir óńir men aýdan boıynsha belgilengen baǵa arqyly jáne onda qurylǵan komıssııasynyń sheshimimen anyqtalady. 2020 jylǵy 7 qazanda oblys ákimdikterine osy sharalardy júrgizý tártibi, qujattar paketin qalyptastyrý kezinde kómek kórsetý týraly hattar joldandy. Qazirgi kezde 15 myńnan astam qus basyna daıyndalǵan qujattar kelip tústi. Olar boıynsha jeke shottarǵa 75 mıllıon teńgeden astam tólem aýdaryldy», - dedi Tursyn Qabdoldanov.

Budan buryn habarlanǵandaı, Aýyl sharýashylyǵy mınıstrliginiń ókilderi qus tumaýyna qatysty jaǵdaıdy baıandady.