Mınıstrlik balabaqsha men mektepterdegi qaýipsizdigi osal óńirlerdi atady
«Bilim berý uıymdaryndaǵy qaýipsizdik jaǵdaıyn bólek aıta keteıin. Almaty, Jetisý, Túrkistan oblystarynyń balabaqshalaryndaǵy qaýipsizdikke erekshe kóńil aýdarýdy suraımyn! Atap aıtqanda, bul óńirlerdegi mektepke deıingi bilim berý uıymdarynda dabyl túımesin ornatý qajet. Sonymen qatar, Almaty, Atyraý jáne Jetisý oblystaryndaǵy balabaqshalardy lıtsenzııalanǵan kúzetpen qamtý mańyzdy. Astana qalasy, Aqmola jáne Abaı oblystaryndaǵy balabaqshalardy týrnıkettermen qamtamasyz etý oryndy. Jedel áreket ortylyqtarynyń nazaryn Almaty, Ulytaý jáne Abaı oblystaryndaǵy mektepterge aýdaryn suraımyn! Qostanaı, SQO, Túrkistan oblystaryndaǵy bilim ordalaryna qajetti deńgeıde lıtsenzııalanǵan kúzet kerek dep esepteımiz. Almaty, Jambyl, Qostanaı oblystary boıynsha dabyl túımeleri de jetkilikti bolýy tıis. Al Túrkistan, Almaty jáne Batys Qazaqstan oblystaryndaǵy mektepterde týrnıketterdiń bolýyna erekshe nazar aýdarýdy suraımyn», - dep másele kóterdi Nasymjan Ospanova.
Sonymen qosa, jıyn barysynda Oqý-aǵartý mınıstri Ǵanı Beısembaev Orta bilim komıtetine oqýshylar úshin arnaıy qaýipsizdik sabaqtarynyń tsıklin ázirleýdi tapsyrdy. Buǵan qosa, mektepke kiretin adamdar tobyna baqylaýdy kúsheıtýdy júktedi.
Qosa ketsek, buǵan deıin vedomstvonyń shuǵyl jıynynda Petropavl mektebinde bolǵan oqıǵanyń mán-jaıyn baıandalyp, tekserý nátıjesinde anyqtalǵan aldyn ala derekterdi jarııalanǵan edi.
Eske salaıyq, keshe Petropavlda 9 synyp oqýshysy mektepke balta men pyshaq ala kelip, 3 oqýshyny jaraqattady. Keıin zardap shekken eki balaǵa ota jasaldy.
Bul oqıǵaǵa qatysty túsinikteme bergen Premer-Mınıstrdiń orynbasary Altaı Kólginov atalǵan mektepte lıtsenzııasy bar kúzet qyzmeti bolmaǵanyn málim etti.
