Mınıstr T.Dúısenova medıtsınalyq qaýymǵa «Densaýlyq» jańa memlekettik baǵdarlamasy týraly baıandap berdi
Mınıstrdiń aıtýynsha, «Densaýlyq» jańa memlekettik baǵdarlamasy buǵan deıin qabyldanǵan 2011-2015 jyldarǵa arnalǵan «Salamatty Qazaqstan» baǵdarlamasynyń dástúrli jalǵasy. Osy ýaqyt aralyǵynda biraz jetistikterge qol jetkizildi. Atap aıtqanda, halyqtyń ómir súrý uzaqtyǵy 71,62 jasqa jetti. Týý kórsetkishi 2,6%-ǵa ósse, ana ólimi 1,9 esege azaıdy. Bala óliminiń kórsetkishi 1,7 esege tómendedi. 2010 jyly bul kórsetkish 16,58 bolsa, 2014 jyly 9,7 boldy. Sondaı-aq Tamara Dúısenova QR Densaýlyq saqtaý salasyn damytýdyń 2016-2019 jyldarǵa arnalǵan «Densaýlyq» jańa memlekettik baǵdarlamasy týraly da aıtty. Mınıstr medıtsınalyq kómekti uıymdastyrý júıesindegi ortalyq býyn medıtsınalyq sanıtarlyq alǵashqy kómek (MSAK) bolatynyn aıtty. Onyń aıasynda tegin ambýlatorlyq emdeýge arnalǵan dárilik zattar tizimin kezeń-kezeńimen ulǵaıtý josparlanyp otyr. «MSAK-tyń ámbebaptylyǵy ári qaraı adamnyń belgili bir jas erekshelikteriniń kezeńine qaraı aǵzadaǵy ózgeristerin eskere otyryp, aýrýlardyń aldyn alý basymdylyǵymen densaýlyǵyn baqylaýǵa negizdelgen ómir boıy otbasylyq qyzmet kórsetý qaǵıdasyna (OQKQ) kóshý arqyly qamtamasyz etiledi. OQKQ-ni aımaqtyń kadrlyq qamtamasyz etilýine baılanysty jalpy praktıka dárigerleri nemese ýchaskelik dárigerlerden turatyn (terapevter, pedıatrlar, gınekologtar) mýltı-tártiptik toptar júzege asyratyn bolady», - dep túsindirdi ol. Sonymen qatar, onyń aıtýynsha, transporttyq medıtsınany, onyń ishinde jedel medıtsınalyq kómek pen telemedıtsına, jyljymaly dárihanalyq pýnktteriniń júıesin ári qaraı damytý kózdelgen. «Dárilik zattardyń sapasyn, qaýipsizdigi men qoljetimdiligin qamtamasyz etý máselelerin sheshý maqsatynda 2015 jyldyń sońyna deıin qazaqstandyq ulttyq dárilik formýlıar (QUF) jasalatyn bolady. QUF-qa álemde «altyn standart» bolyp esepteletin brıtandyq ulttyq dárilik formýlıar negiz boldy», - dedi mınıstr. Onyń aıtýynsha, QUF Qazaqstanda tirkelgen barlyq dárilik zattardyń tizimin, olardyń klınıkalyq dáleldengen tıimdiligi, oryn alýy múmkin keri áseri týraly, árbir preparattyń shekti baǵasy jaıynda aqparatty qamtıtyn bolady. Osylaısha, ol tek dárigerler úshin emes, el azamattary úshin de úlken anyqtamalyq bolmaq.
