Mınıstr eskertip mıtıngke shyǵýǵa qatysty pikir bildirdi

NUR-SULTAN. QazAqparat – Mıtıngke eskertip shyǵý – bassyzdyq degendi bildirmeıdi. Bul týraly Aqparat jáne qoǵamdyq damý mınıstri Dáýren Abaev aıtty, dep habarlaıdy QazAqparat tilshisi.

«Mıtıngke eskertip shyǵý – bassyzdyq degendi bildirmeıdi. Engizilgeli jatqan tyń qaǵıdattar uıymdastyrýshylar men qatysýshylarǵa aıtarlyqtaı salmaqty jaýapkershilik júktegeli otyrǵanyn uǵyný kerek. Máselen, Eýropanyń birqatar elinde aktsııa ótkizý týraly uıymdastyrýshylar aldyn ala eskertýi kerek. Demonstratsııaǵa betperde kıip kelýge bolmaıdy. Bilýimshe, uıymdastyrýshylar aktsııa kezinde tártiptiń saqtalýyna da, qaýipsizdikke de jaýap beredi. Aktsııadan keıin qarapaıym ǵana júrgen jerdi tazartyp ketý de – jaýapkershilik. Sol sebepti, eskertip shyǵý tártibin bassyzdyqpen shatastyryp almaıyq. Álbette, belgili bir protsedýralar bolady. Ol týraly Memleket basshysynyń tıisti tapsyrmasy bar. Osy jumysty keńinen júrgizetin bolamyz», - dedi Dáýren Abaev Habar arnasynan kórsetilgen «Ashyq dıalog» baǵdarlamasynda.

Eske sala ketsek, Ulttyq qoǵamdyq senim keńesiniń ekinshi otyrysynda QR Prezıdent Qasym-Jomart Toqaev mıtıngter quqyq qana emes, sonymen qatar jaýapkershilik ekenin túsiný kerektigin atap ótken edi.