Mınıstr «Báıterek» kesheniniń ekologııalyq qaýipsizdigi týraly túsindirdi

NUR-SULTAN. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıev «Báıterek» ǵarysh kesheninde qandaı tasymaldaǵysh zymyrandar paıdalanylatynyn aıtty, dep habarlaıdy QazAqparat tilshisi.

«Hattamanyń birinshi babynda «Báıterek» kesheni ekologııalyq qaýipsizdik deńgeıi joǵary tasymaldaǵysh zymyrandardy ushyrýǵa arnalatyny atap ótilgen. Osyǵan baılanysty «Báıterek» kesheninen ushyrý úshin qandaı tasymaldaǵysh zymyrandar qoldanylady?», - dep surady depýtat Bekbolat Tileýhan Parlament Májilisiniń jalpy otyrysynda.

Óz kezeginde mınıstr A. Jumaǵalıev «Proton» ekologııalyq jaǵynan tıimsiz ekenin, óıtkeni bul tasymaldaǵysh zymyranda geptıl otyny paıdalanylatynyn jetkizdi.

«Soıýz-5» tasymaldaǵyshynda geptıl otyny paıdalanylmaıdy, ıaǵnı onda ottegi men kerosın otyny bolady. Osy oraıda ekologııalyq jaǵynan áldeqaıda tıimdirek. Bul rette ekologııalyq turǵyda másele týyndamaıdy. Sonymen qatar, kommertsııalyq jaǵynan «Soıýz-5» zymyryn tasymaldaǵyshy «Protonmen» salystyrǵanda tıimdi», - dedi Asqar Jumaǵalıev.

Budan buryn habarlanǵandaı, Májilistiń jalpy otyrysynda «2004 jylǵy 22 jeltoqsandaǵy QR Úkimeti men RF Úkimeti arasyndaǵy «Baıqońyr» ǵarysh aılaǵynda «Báıterek» ǵarysh zymyran keshenin qurý týraly kelisimge ózgerister men tolyqtyrýlar engizý týraly hattamany ratıfıkatsııalaý týral» zań jobasy maquldandy.

Osy jobada Reseı tarapy «Soıýz-5» zymyrandy, tehnıkalyq jáne starttyq keshenderinde baqylaý-tekserý jabdyqtaryn qurýdy, sondaı-aq údemeli bloktyń tehnıkalyq keshenin, ǵarysh apparatyn jáne ǵaryshtyq bastıek bóligin jańǵyrtýdy qamtamasyz etedi. Osy jumystar 916 mln AQSh dollary somasynda baǵalandy. Jańǵyrtý maqsatynda 2018 jyly «Baıqońyr» aılaǵynyń 42,43 jáne 45-shi alańdarynda ornalasqan «Zenıt-M» kesheniniń 243 nysany Qazaqstan tarapyna berildi. Qazaqstan tarapy «Zenıt-M» kesheniniń jerústi ınfraqurylymy nysandaryn qaıta jańartý men jańǵyrtý jumystaryn júrgizedi.