Mınıstr Abaev «Ádebıet portalynyń» tanystyrylymynda óleń oqyp berdi
Atalǵan portaldyń jumys istep jatqanyna úsh jyl boldy. Saıttyń jańa nusqasyna birneshe ózgeris engizildi. Birinshiden, portaldyń vızýaldyq kelbeti zamanǵa saı ózgertilip, oqyrman úshin jeńil ári yńǵaıly qyzmetter engizilip otyr. Ekinshiden, kez kelgen qoldanýshy jeke blogyn ashyp, ádebıet taqyrybynda erkin pikir almasa alady. Úshinshiden, saıttyń mobıldi nusqasy iske qosyldy.
Búgingi shara barysynda Myrzataı Joldasbekov, Tólen Ábdik syndy elimizge belgili qoǵam qaıratkerleri men jazýshylar óz tilekterin bildirip, árbireýi bir-bir óleń shýmaǵyn joldady. Aqparat jáne kommýnıkatsılar mınıstri Dáýren Abaev ta olardan qalyspaı, Qadyr Myrza-Áliniń bir óleńin oqyp berdi.
"Eki-úsh kún buryn alqa májilisinde Myrzataı aǵamyz "Kindigimdi kesken jurt" degen keremet bir kitapty syılap edi. Sony qarap shyǵyp, bir óleń qatty unady. Sol óleńdi oqyp bereıin. Avtory - Qadyr Myrza-Áli aǵamyz:
"Qabat-qabat bult tónse de basyńa,
Qabaǵyńdy shytpa, jigit, jasyma!
Biz sheginsek, biz jeńilsek, bizderdi,
Baıqap turyp ne istemekshi jas ulan?!
Ot ishinde, órt ishinde kúıgende,
Basyńdy ıme, tize búkpe, ımenbe!
Er eńkeıse eńkeıedi jalǵyz-aq
Týǵan jerdiń topyraǵyn súıgende!".
Ádebıet portalynyń jańa nusqasy qutty bolsyn! Osy jańa qadam elge ádebıetti jańasha nasıxattaýǵa óz úlesin qosady dep senemin", - dedi Abaev.
Aıta keteıik, "Ádebıet portaly" aqparat jáne kommýnıkatsııalar mınıstrligine qarasty "Qazkontent" AQ quramyna kiredi. Qazirgi kezde portalda 4 myńnan astam kitap bar. Sondaı-aq úsh myńnan astam avtordyń jeke paraqshasy ashylǵan.
