«Myń boıaýly Býrabaı»: Tilshiler tabıǵı parktiń tynys-tirshiligimen tanysty
QR Prezıdenti Іs basqarmasyna qarasty «Býrabaı» memlekettik ulttyq tabıǵı parkine baspasóz sapary ótti, dep habarlaıdy QazAqparat.
Sapar aıasynda BAQ ókilderi QR Prezıdenti Іs basqarmasyna qarasty «Býrabaı-Damý» JShS uıymdastyrýymen ótip jatqan dástúrli «Býrabaı tuqy-2023» týrnırin tamashalady.
Balyqshylar jarysynda Qazaqstannyń túkpir-túkpirinen kelgen komandalar Qotyrkól kólinen tuqy balyǵyn aýlap jarysyp jatyr.
– Bul týrnır buryn elimizdiń ózge óńirlerinde ótetin. Bıyl Aqmola oblysynda alǵash ret uıymdastyrylyp otyr. Ereje boıynsha, ár komanda eki balyqshydan turady. Bizdiń jarysqa elimizdiń kóptegen oblystarynan 30 komanda keldi, – dedi «Býrabaı-Damý» seriktestiginiń týrızm jáne marketıng bóliminiń bas menedjeri Oljas Danııarov.
Saıys erejesi boıynsha, balyqshylar ustaǵan balyǵyn sýretke túsirip, salmaǵyn ólshep, qazylardyń esebine tirketken soń, birden sýǵa jiberedi. Qazylar salmaǵy 1,5 kılodan asatyn balyqtardy ǵana esepke alady. Búgin tańǵy 7:00-de bastalǵan erteń tańǵy 10:00-de márege jetýge tıis.
Sondaı-aq, «Myń boıaýly Býrabaı» baspasóz sapary aıasynda BAQ ókilderi «Mırnyı» orman sharýashylyǵyna baryp, Ulttyq park qyzmetkerleriniń janýarlarǵa qysqy jemshóp daıyndaý barysymen tanysty. Askanııa buǵylarynyń tynys-tirshiligin baqylady.
Ulttyq parktiń aǵa ǵylymı qyzmetkeri Evgenıı Arhıpov jýrnalısterge fototuzaq ornatý ádisterin kórsetti.
– Fototuzaq arqyly jergilikti ań-qustardyń sanyn, ósimin, qaı jerlerde jıi kezdesetinin, jalpy tynys-tirshiligin zertteımiz, – deıdi ǵalym.
BAQ ókilderi «Býrabaı» memlekettik ulttyq tabıǵı parkiniń qurylymdyq bólimi sanalatyn Maral sharýashylyǵyna bardy. Sharýashylyqta 200 basqa jýyq ásem janýar bar. Barlyq buǵy-maraldarǵa únemi veterınarlyq baqylaý jasalady. Pantoterapııa ortalyǵyna qajetti emdik ónim alynady.
