Mıllıardtaǵan qarjy jelge ushty: tsıfrlyq sala boıynsha memlekettik aýdıt tekseris júrgizdi
ASTANA. KAZINFORM – Joǵary aýdıtorlyq palatasynda tsıfrlyq damý saıasaty tıimdiligine júrgizilgen memlekettik aýdıttiń qorytyndysy shyǵaryldy. Aýdıt nátıjeleri Álıhan Smaıylovtyń tóraǵalyǵymen ótken Joǵary aýdıtorlyq palata otyrysynda qaraldy.
- Aýdıt materıaldarynda kórsetilgendeı, 2016-2017 jyldary «Innovatsııalyq tehnologııalar parki» AKQ sheńberinde 5 tehnologııalyq damý ortalyǵyn jáne 1 venchýrlik qordy qurýǵa bıýdjetten 4,9 mlrd teńge bólingen. Degenmen 3 ortalyqtyń qyzmeti tıimsiz jáne nátıjesiz bolyp shyqqan, 2 kompanııa perspektıvalyq damý josparlarynsyz jumys isteıdi. Osylaısha, 3 mlrd teńge tıimsiz paıdalanylǵan. «Innovatsııalyq tehnologııalar parki» AKQ arqyly bıýdjet esebinen 987 mln teńgeden astam somaǵa qarjylandyrylǵan 95 startapqa salynǵan ınvestıtsııalardyń nátıjeliligi men tabystylyǵy rastalmaı otyr. Bul rette 2018-2020 jyldary qarjylandyrylǵan 32 uıym taratylǵan, onyń 18-i májbúrleý tártibimen taratylǵan. Taǵy 21 kompanııa nóldik salyq eseptiligimen jumys isteıdi, bul qyzmettiń joqtyǵyn kórsetedi, - delingen Joǵary aýdıtorlyq palatanyń habarlamasynda.
«Innovatsııalyq tehnologııalar parki» AKQ-ǵa 2015 jyldan 2024 jylǵa deıin bıýdjet qarajatynan bólek jer qoınaýyn paıdalanýshylardan ǵylymı-zertteý jáne tájirıbelik-konstrýktorlyq jumystardy (ǴZTKJ) qarjylandyrý boıynsha mindettemeler retinde 41 mlrd teńge túsken. Bul rette «Innovatsııalyq tehnologııalar parki» AKQ saraptamalyq komıssııasy ǴZTKJ-ny qamtamasyz etýge jaýap bermeıdi, bul osy baǵytta qabyldanatyn sheshimderdiń ashyqtyǵy men birtektiligine kúmán keltiredi. Nátıjesinde 14,8 mlrd teńgege 179 joba negizinen bıznestiń aǵymdaǵy mindetterin sheshýge baǵyttalǵan, al ǵylymdy damytýǵa jáne jańa tehnologııalardy jasap shyǵarýǵa yqpal etpegen.
Sonymen qatar ǴZTKJ jobalaryn iske asyrý úshin kózdelgen qarajatty ózge maqsatta paıdalanýǵa yqpal etetin faktorlar anyqtalǵan. Bul «Innovatsııalyq tehnologııalar parki» AKQ-da basqarýdyń jáne eseptiliktiń ashyqtyǵyn qamtamasyz etetin mehanızmderdi shuǵyl engizýdi talap etedi.
- «Ulttyq aqparattyq tehnologııalar» AQ 34 aqparattyq júıege qyzmet kórsetedi. Olardyń 85%-nyń tehnologııalary eskirgen jáne monolıtti kodta jumys isteıdi. Bul mekemege bekitilgen 50 aqparattandyrý obektileri boıynsha 28 aqparattyq júıe jáne 1 apparattyq-baǵdarlamalyq keshenge ózekti bolmaýyna baılanysty is júzinde qyzmet kórsetilmeıdi. Jalpy aýdıt qorytyndysy boıynsha 1,1 mlrd teńgege qarjylyq buzýshylyq anyqtaldy. Bıýdjet qarajaty men aktıvterin tıimsiz josparlaý 2,2 mlrd teńge, al olardy tıimsiz paıdalaný 46,5 mlrd teńge. Sondaı-aq 45 júıelik kemshilik pen 143 protsedýralyq buzý anyqtaldy, - delingen habarlamada.
Buǵan deıin shetelge ketkenderge 8 mln teńgege dári-dármek resimdeý derekteri anyqtalǵany týraly jazǵan bolatynbyz.