Mıhaıl Pelıh: Volonterlik - otbasymyzdyń dástúri
– Áńgimemizdiń álqısasyn otbasylyq volonterlikten bastasaq, búgingi qoǵam úshin aýadaı qajet osy ıgi ispen aınalysyp júrgenderińizge qansha ýaqyt boldy?
– Bizdiń otbasymyzdyń volonterlikpen aınalysyp jatqanyna shırek ǵasyrdan asady. Volonterlik bizdiń otbasymyzda úsh urpaq – ájeden bastap nemerege jalǵasyp keledi. Alǵashqy da anamyz, búgingi otbasymyzdyń ájesi jaqsylyq jasaýdy bastaǵan bolatyn. Ol kezde elimizde volonterlik memlekettik deńgeıde nasıhattalmaǵan, muqtaj janǵa kómektesken, qoǵamdyq jumystarǵa atsalysqan adamdy eriktiler deıtin. Sol anamyzdyń tárbıesin kórip ósken bizder volonterlik joldy tańdadyq. Negizgi mamandyǵymyz bolǵanymen udaıy jaqsylyq jasaǵamyz kelip turady. Jaqsylyq jasaý qanymyzda bar. Bul jaqsy qassıetti óshirmeı, urpaqtan-urpaqqa mıras etý. «Tselına» qoǵamdyq qoryn ashýymyz da osynyń bir aıǵaǵy ispettes.
– «Tselına» qoǵamdyq qoryn ashtyq dedińiz. Qazirgi tańda bul qoǵamdyq qory tarapynan qandaı ıgi ister atqarylýda. Osyǵan naqtyraq toqtala ketseńiz?
– Qazaqstannyń ósip-órkendeýine, elimizdiń beıbit ómir keshýine óz úlesterin qosqan osy ardaqty da aıaýly qarttarymyzdyń ómir joldary búgingi urpaqqa úlgi-ónege. Osy kúni elimizde qarttarǵa úlken mán berip, kóńil aýdaryp, jan-jaqty qamqorlyq jasalýda. Ásirese, óz betimen qozǵalýy qıyn ardagerlerge qysta jer úı aýlasyndaǵy qardy kúrep, sý tasý qıynnyń qıyny. Mundaıda jastar men eriktiler únemi kómektesýge ázir. «Tselına» qoǵamdyq qorynyń basty jumysy da osy – aýdan aýmaǵynda bireýdiń kómegine zárý tyl jáne eń ardagerleriniń úıine baryp, aýlalary men úı mańynyń qaryn kúrep, kúl-qoqystan tazartýda kómektesý.
Búgingi kúni Atbasar aýdanynda da bireýdiń kómegine muqtaj ardagerleri bar. Sondaı jandardyń biri – tyl ardagerleri erli-zaıypty Nıkolaı men Lıýmıla Rýdenkonyń otbasy. 95 jáne 88 jastaǵy qarııalar kezinde tylda eńbek etken. Eki ul ósirip, olar Reseıge qonys aýdarǵan. Ózderi qazirgi tańda Atbasarda turyp jatyr. Ózim bastaǵan eriktiler – Danıl Panchenko men Maqsat Pelıýshko atalmysh qarııalardyń úıine baryp, aýlalary men úı mańaıynyń qaryn kúrep, kúl-qoqystan tazartýǵa kómektestik.
Jyl saıyn kóktem aılarynda Atbasar qalasyna Jabaı ózeninen sý tasqynynyń qaýipti tónedi. Segiz jyldan beri kóktemde ózendi sýretke túsirip, sýdyń deńgeıin baqylaýǵa, sý shaıǵan aýmaqtardaǵy turǵyndardy evakýatsııalaýǵa kómektesemiz.
– Qoǵamdyq qorǵa múshe qansha volonter bar?
– Aýdanynda 100-ge jýyq erikti tirkelgen bolsa, osy kúni onyń 20-sy belsendi jumys isteýde. Olardyń deni «Tselına» qoǵamdyq qoryna múshesi. «Aǵa býynǵa qamqorlyq jasaý – jas urpaqtyń paryzy. Bizdegi eriktiler ardagerlerimizge qysqa otyn daıyndap, aýlany qardan tazartýdy, dúkennen kerekti azyq-túlik pen dárihanadan dári-dármegin alyp kelýdi ózderiniń mindeti sanaıdy. Budan bólek, aýdan volonterleri dúnıejúzine taraǵan koronavırýs ınfektsııasynyń óńirde tarap ketpesi úshin qolǵa alynǵan sanıtarlyq sharalaryna úles qosyp keledi.
Memleket basshysynyń «Biz birgemiz» jobasy sheńberinde aýdan turǵyndaryna tabıǵatty aıalap, qorshaǵan ortany lastamaı, tazalyq saqtaý qajettigi jaıly túsindirý jumystaryn júrgizýge atsalysyp kelemiz.
– Áńgimeńizge rahmet.
