Mıhaıl Lomtadze «Jeńis» klýbynyń ıesi atandy

ASTANA. KAZINFORM - Mıhaıl Lomtadze elordalyq «Jeńis» fýtbol klýbyna jáne Astanada álemdik deńgeıdegi balalar akademııasyn qurýǵa ınvestıtsııa salady.

Qazirge deıin ol álemdik deńgeıdegi fýtbol akademııasyn qurý jospary týraly habarlaǵan edi. Endigi kezekte akademııanyń Astanadaǵy «Jeńis» fýtbol bazasynda salynatyny anyqtaldy. Onda jas talanttar halyqaralyq standarttar boıynsha tegin jattyǵa alady.

- Meniń armanym - Qazaqstanda jáne Anglııada eń talantty jas fýtbolshylar, bolashaq juldyzdar tárbıelenetin álemdik deńgeıdegi kásibı balalar fýtbol akademııasyn qurý. Oqytý tolyǵymen tegin bolady. Jas sportshylar elimizdiń jáne fýtboldyń otany - Anglııanyń jetekshi mamandarymen jattyǵýǵa múmkindik alady, -dedi Mıhaıl Lomtadze.

«Jeńis» fýtbol klýbynyń bas dırektory Aıdyn Qojahmettiń aıtýynsha, Mıhaıl Lomtadze sııaqty ınvestordyń kelýi – klýbtyń damýy úshin úlken múmkindik.

- Biz fýtboldyń bolashaǵy balalardan, ınfraqurylymnan jáne zamanaýı ádistemelerden bastalatynyn bárimiz túsinemiz. «Jeńistiń» baı tarıhy bar jáne biz birlese otyryp, klýbtyń burynǵy dańqyn qaıtara alatynymyzǵa jáne búkil qazaqstandyq fýtboldyń jarqyn bolashaǵyna úles qosa alatynymyzǵa senimdimiz, - dedi ol.

Eske salsaq, budan buryn elimizde «Qaısar» jáne «Qyzyljar» klýbtary jekemenshikke ótti.