Mıhaıl Kýkýshkın Glazgo týrnıriniń jartylaı fınalynda oınaıdy

ASTANA. KAZINFORM — Qazaqstandyq, álemniń 293-raketkasy Mıhaıl Kýkýshkın Glazgo (Ulybrıtanııa) chellendjer týrnıriniń jartylaı fınalyna shyqty.

Qazaqstandyq tennısshi shırek fınalda álemdik reıtıngide ózinen on saty joǵary turǵan germanııalyq Tom Genchpen kezdesti.

Kýkýshkın matchty eki sette bitire bildi — 6:2, 6:4.

Bir saǵat 26 mınýtqa sozylǵan básekede 38 jastaǵy qazaqstandyq sportshy 4 eıs jasap, 7 breık-poınttyń úsheýin óz esebine jazdy. Gench 12 eıspen kózge tústi.

Mıhaıl Kýkýshkın fınalǵa shyǵý úshin álemniń 300-raketkasy, chehııalyq Gınek Bartonmen talasady. Ol shırek fınalda reıtıngide 218-oryndaǵy kort ıesi Iohannýs Mandeıdi joldan taıdyrdy — 7:6 (7:2), 6:3.

Atalmysh jarys qory — 56 700 eýro. Doda jeńimpazy 8 550 eýroǵa qosa 50 reıtıngilik upaıǵa ıe bolady.

Qazaqstannyń áıelder arasynda juptyq syndaǵy birinshi, álemniń 14-raketkasy Anna Danılına Adelaıda (Aýstralııa) WTA 500 týrnıriniń fınalyna shyǵa almady.

A.Danılına serbııalyq Aleksandra Krýnıchpen birge jartylaı fınalda jarystyń 2-raketkalary, chehııalyq Katerjına Sınıakova — qytaılyq Chjan Shýaıǵa ese jiberdi — 4:6, 6:2, 8:10.

Eske sala keteıik, budan buryn Anna Danılınanyń Aýstralııadaǵy jarystyń jartylaı fınalyna joldama alǵanyn jazǵan edik. 

Sondaı-aq qazaqstandyq tennısshilerdiń Aýstralııa ashyq birinshiligindegi qarsylastary anyqtaldy.