Microsoft kompanııasynyń naryqtyq quny alǵash ret 4 trln dollardan asty

ASTANA. KAZINFORM — 31 shildede Microsoft korporatsııasynyń naryqtyq quny alǵash ret 4 trln AQSh dollarynan asyp, bul mejege jetken álemdegi ekinshi jarııa kompanııa atandy, dep habarlaıdy DW.

30 shildede jarııalanǵan toqsandyq esepten keıin Microsoft aktsııalary tarıhı maksımýmǵa deıin qymbattady. Qujatta kórsetilgen tabys kórsetkishteri sarapshylardyń boljamynan joǵary boldy. Atap aıtqanda, kompanııa Microsoft Azure bultty platformasyna qatysty qyzmetter satylymynyń kúrt artqanyn habarlady.

Sonymen qatar korporatsııa jasandy ıntellektti damytýǵa 30 mlrd dollar kóleminde rekordtyq ınvestıtsııa salýdy josparlap otyr.

BAQ málimetinshe, 31 shildede Nıý-Iork qor bırjasyndaǵy saýda-sattyqtyń ashylýynda Microsoft aktsııalary 6,25 paıyzǵa ósip, bir danasy 560 dollarǵa jetti. Alaıda keıinirek aktsııa quny 535 dollarǵa deıin tómendedi. Bul kompanııanyń kapıtalızatsııasynyń 3,980 trln dollarǵa deıin qysqarýyna sebep boldy.

Aıta keteıik, buǵan deıin 9 shildede amerıkalyq grafıkalyq protsessorlar óndirýshisi Nvidia alǵashqy bolyp 4 trln dollar kapıtalızatsııa mejesin eńsergen edi. Bar-joǵy úsh jyl buryn 400 mlrd dollar shamasynda baǵalanǵan bul kompanııa búginde Microsoft-ty basyp ozyp, álemdegi eń qymbat korporatsııaǵa aınaldy. Nvidia-nyń qarqyndy ósýi jasandy ıntellekt salasynyń damýyna tikeleı baılanysty. Sebebi neırojelilerdiń jumysy úshin dál osy kompanııanyń grafıkalyq protsessorlary qajet.

Qazirgi ýaqytta Nvidia kompanııasynyń naryqtyq quny 4,4 trln dollarǵa jetken. Úshinshi orynda – Apple (3,125 trln dollar), odan keıin Amazon (2,4 trln) jáne Alphabet (Google holdıngi, 2,3 trln).

Al Meta kompanııasynyń (Facebook jáne Instagram jelileriniń ıesi) kapıtalızatsııasy 1,9 trln dollardy qurap otyr.

Eske salaıyq, buǵan deıin Microsoft JI kómegimen 500 mıllıon dollardan astam qarjy únemdegenin jazdyq.