Microsoft AI-chıp óndirýde Amazon men Google-dan basym túse bastady

ASTANA. KAZINFORM – Microsoft kompanııasy jasandy ıntellektige arnalǵan ózderiniń eń qýatty chıpi – Maia 200 modelin jurtshylyqqa tanystyrdy. Kompanııanyń aıtýynsha, bul chıp jyldamdyǵy men qýatty únemdeýi jaǵynan Amazon men Google qoldanyp otyrǵan tehnologııalardan kem túspeıdi. 

Microsoft ókilderi Maia 200 burynǵy chıpterge qaraǵanda áldeqaıda tıimdi ekenin aıtady. Baǵasy men múmkindigin salystyrǵanda, ol 30%-ǵa utymdy. Al Amazon Trainium chıpimen salystyrǵanda, 3 ese jyldam jumys isteıdi. 

– Maia 200 – bizdiń osy ýaqytqa deıin jasaǵan eń qýatty AI-chıpimiz. Ol jasandy ıntellekt júıelerin iske qosýǵa ketetin shyǵyndy azaıtyp, jumysyn jyldamdatady, - dep málimdedi kompanııa.

Jańa chıp negizinen jasandy ıntellektiniń mátin jazý, suraqqa jaýap berý nemese sýret jasaý sekildi qyzmetterine arnalǵan. 

Kompanııanyń dereginshe, Maia 200 qazir derekter ortalyqtarynda qoldanylyp júrgen jabdyqtardan áldeqaıda ónimdi. Microsoft ony basqa iri bultty platformalardaǵy básekeles chıpterden de ozyq dep otyr.

– Maia 200 Amazon-nyń úshinshi býyndaǵy Trainium chıpinen úsh ese jyldam. Al Google-dyń jetinshi býyndaǵy TPU chıpimen salystyrǵanda da ónimdiligi joǵary, - delingen resmı habarlamada.

Maia 200 zamanaýı 3 nanometrlik tehnologııamen jasalǵan. Onyń ishinde 140 mıllıardtan astam tranzıstor (elektr togyn kúsheıtetin nemese qosyp-óshiretin óte kishkentaı elektrondyq bólshek) bar. Chıp qýatty kóp jumsamaı, jyldam esepteýge ıkemdelgen. Bul qazirgi iri jasandy ıntellekt modelderi úshin óte mańyzdy.

Microsoft ókilderiniń aıtýynsha, Maia 200 búgingi eń kúrdeli AI modelderin erkin iske qosa alady ári bolashaqta odan da aýqymdy júıelerge daıyn. 

Jańa chıp Microsoft-tyń negizgi servısterinde qoldanylatyn bolady. Atap aıtqanda, Azure, Microsoft Foundry jáne Microsoft 365 Copilot osy chıpke súıenedi. Sonymen qatar, OpenAI jasaǵan GPT-5.2 modelderi de Maia 200 arqyly jumys isteıdi.

– Kompanııa ishindegi Superintelligence toby bul chıpti jasandy derekter qurastyrý jáne keleshektegi AI júıelerin jetildirý úshin paıdalanbaq, - dep habarlady Microsoft.

Qazir Maia 200 AQSh-tyń Aıova shtatyndaǵy De-Moın qalasyna jaqyn derekter ortalyǵynda iske qosylǵan. Aldaǵy ýaqytta Arızona shtatynyń Fınıks aımaǵynda da qoldanysqa engiziledi. Kompanııa chıpti birtindep basqa óńirlerdegi bultty ınfraqurylymyna taratýdy kózdep otyr. 

Sonymen qatar Microsoft Maia 200-ge arnalǵan arnaıy baǵdarlamalyq quraldar jıyntyǵyn tanystyrdy. Bul quraldar ázirleýshilerge burynǵy jasandy ıntellekt modelderin jańa chıpke ońaı kóshirýge, arnaıy tereń tehnıkalyq bilimdi qajet etpeı, júıeniń jumysyn retteýge kómektesedi. 

Aıta keteıik, Microsoft kompanııasy ótken jyly Call-ortalyqtarynda JI qoldaný arqyly 500 mıllıon dollardan astam qarjy únemdegen.