Meıirgerlerdi ómirdiń ózi qataldyqqa úıretedi – medbıkelermen suhbat

ASTANA. KAZINFORM — Búgin – Halyqaralyq meıirgerler kúni. Soǵan oraı «Búgin LIVE» stýdııasyna 30 jyldan astam ýaqyt boıy adam janyn arashalap júrgen aq halattylar qonaq boldy.

Sáýle Ysqaqova 1985 jyldan beri medbıke bolyp qyzmet etedi. Ómiriniń 40 jylyn medıtsına salasyna arnaǵan abzal jan bala kezinen osy mamandyqty armandaǵanyn aıtady.

– Men bala kezimnen bir ǵana mamandyqty tańdap, medıtsına qyzmetkeri bolamyn dep sheshtim. Bul sheshimime áser etken – meniń apalarym. Apalarym da kásibı dárigerler. Jyldar boıy jalǵasqan dástúr boıynsha, arttarynan men de medıtsına salasynda jumys isteımin. Menen keıin meniń balalarym jalǵastyryp jatyr. Sol sebepti bizdiń áýletimiz – dárigerler áýleti. Qazir tórtinshi býyn osy salada qyzmet etip jatyr. 40 jyldan beri bir salada, anestezıologııa-reanımatologııa bóliminde meıirger, medbıke bolyp istep kele jatyrmyn, – deıdi 2-kópbeıindi qalalyq aýrýhana medbıkesi.

Almıra Eńsebaeva da dál osy aýrýhanada qyzmet etedi. Eńbek jolyn Shyǵys Qazaqstan oblysynda bastaǵan. 30 jyl boıy medbıke bolyp jumys istegen stýdııa qonaǵy pandemııa kezindegi qıyn kúnderin eske aldy.

– Pandemııa jańadan bastalyp jatqanda fıltr kabınetinde jumys istedik. Biz ol kezde ýaqytqa múlde qaramadyq. Arbamen kele jatqan naýqastarǵa alǵashqy kómek kórsetip, búgin bireýiniń bolsa da jaǵdaıy ońalsa eken, osy jerden aman ketse eken dep, janushyra kómektesetin edik. Elimizde kóp turǵyn osy pandemııanyń kesirinen o dúnıege attandy. Sol ýaqyttary kún-tún demeı jumys istedik, otbasymyzdy tipti de umyttyq. Ol kezder óte qıyn boldy. Soǵan qaramastan naýqastarǵa kóz jasymyzdy kórsetken joqpyz. Tek alǵa umtyla berdik. Bir naýqastyń beti beri qarasa, medbıkeler men dárigerler júgirip baryp, «aty-jónin aıtyp, ana naýqas kózin ashty» dep qýanyp, súıinshi suraıtynbyz. Kózben kórgen basqa, sózben aıtqanda basqasha, – deıdi ol.

Keıipkerlerimiz bul jumystyń ońaı emestigin aıtady. Tipti medbıkelik qyzmet názik jandardy qataldyqqa tárbıelegenin de jasyrmady.

– Bizdiń mamandyǵymyz ońaı dep aıta almaımyz. Tek ózimizdiń jeke taǵdyrymyz ǵana emes, aldymyzǵa kelgen naýqastardyń da taǵdyryna jaýaptymyz. Biraq jumysymyzdy jaqsy kórgen soń, qıyndyǵyna qaramaı, qanshama adamdarǵa kómektesip jatyrmyz. Qanshama adamdardyń ómirin arashalap qaldyq. Kúni-túni naýqastardyń ómirin saqtap qalý úshin arpalysamyz. Bizde ózgelerdikindeı 5 kún jumys, mereke kúnderi demalý degen joq. 24/7 jumys isteımiz ǵoı. Mereke kúnderi tipti kúsheıtilgen qosymsha brıgadalar iske kirisedi. Al naýqastar josparsyz, shuǵyl túrde túsedi. Neshe túrli jol apatynan adamdar kelýi múmkin. Tóbeden qulaıdy, balalar jaraqat alyp jatady. Biz qaramaımyz, aldymyzǵa kim kelse, soǵan járdemdesemiz. Medbıke úshin psıhologııanyń myǵym bolýy óte mańyzdy. Ol sabyrly, tózimdi bolýy kerek jáne emotsııaǵa berilmeýi kerek. Naýqas seniń aldyńa kómek surap kelip tur ǵoı. Sen onymen birge jylap, onymen birge sasqalaqtap, emotsııaǵa berilip tursań, ýaqyt ótip ketedi. Kómektesip úlgermeı qalýyń múmkin. Medbıkelerdi ómir qatal bolýǵa solaı tárbıeleıdi, – deıdi Sáýle Ysqaqova.

Aıta keteıik, medbıkelerge keıbir retseptterdi jazýǵa ruqsat berilýi múmkin.