Mettıý Perrıdiń ólimi: akterdiń dárigeri 2,5 jylǵa bas bostandyǵynan aıyryldy

ASTANA. KAZINFORM – Amerıkalyq sot «Dostar» telehıkaıasynyń juldyzy Mettıý Perrıge ketamın jetkizgen kalıfornııalyq dárigerdi 2,5 jylǵa bas bostandyǵynan aıyrý jazasyna kesti, dep habarlaıdy BBC. 

Doktor Salvador Plasensııa Perrıge ketamın jetkizgeni úshin sottalǵan alǵashqy adam boldy. Bul is boıynsha bes adamǵa aıyp taǵyldy, onyń ishinde taǵy bir dáriger, akterdiń jeke kómekshisi jáne onyń ólimine sebep bolǵan dozany usynǵan dep aıyptalǵan eki adam bar. Olardyń barlyǵy kinásin moıyndady jáne aldaǵy aılarda sottalady.

Perrı qaıtys bolǵannan keıin AQSh federaldy bıligi aýqymdy tergeý júrgizip, onyń ketamındi Gollıvýdta jumys isteıtin jasyryn esirtki saýdasy jelisi arqyly alǵanyn anyqtady. 

Akterdiń otbasy sýdıadan Plasensııany basqa aıyptalýshylarǵa qaraǵanda «kinási kóbirek» dep málimdep, uzaq merzimge sottaýyn surady. 

- Men ony ósirgim keledi. Munyń bárin oǵan qalaı túsindirerimdi oılap otyrmyn. Men óz-ózimdi súrindirdim. Maǵan aqtaý joq. Jasalǵan isti keri qaıtarý múmkin emes. Men muny bilemin. Anasy aıtqandaı, men ony qorǵaýym kerek edi. Meni keshirińizder, - dedi dáriger. 

Plasensııaǵa taǵylǵan aıyptar boıynsha 40 jylǵa deıin bas bostandyǵynan aıyrý jazasy taǵaıyndalýy múmkin edi, biraq prokýrorlar úsh jylǵa jazalaýdy suraǵan bolatyn.

Plesensııa kinásin moıyndaý týraly hatynda emhanasynnyń qarjylyq qıyndyqtarǵa tap bolǵanyn jáne Perrıdiń esirtkige táýeldiliginiń belgilerin baıqaǵanymen, «úlken somadaǵy aqsha usynysy tartymdy bolǵanyn» túsindirdi. 

Ketamın, AQSh Esirtkige qarsy kúres basqarmasynyń málimetinshe, gallıýtsınogendik áserleri bar dıssotsıatıvti anestetık. Ol kórý jáne estý qabiletin burmalap, paıdalanýshyda oqshaýlaný jáne baqylaýdy joǵaltý sezimin týdyrýy múmkin.

Ol adamdar men janýarlarǵa ınektsııalyq anestezııa retinde qoldanylady, sebebi ol patsıentterge aýyrsynýdy sezinbeýge jáne shyndyqtan alshaqtaýǵa múmkindik beredi. 

Zertteýshilerdiń aıtýynsha, bul preparatty tek dáriger salýy kerek, al ony qabyldaıtyn patsıentter densaýlyqqa yqtımal saldarǵa baılanysty mamannyń baqylaýynda bolýy tıis. 

Perrı ketamındi dárigerdiń ruqsatymen zańdy túrde qabyldaǵan, biraq ártúrli kózderden taǵaıyndalǵan mólsherden joǵary dozalardy alýǵa tyrysqan. 

Prokýratýranyń málimetinshe, Plasensııa akterge ketamın ınektsııalaryn onyń úıinde jáne Los-Andjelesten shamamen 30 shaqyrym jerde ornalasqan akvarıýmnyń turaǵynda salǵan. 

Plasensııa sonymen qatar Perrıdiń kómekshisi Kennet Ivamasaǵa ketamın salýdy úıretip, oǵan qosymsha dozalar satqan. Prokýrorlardyń aıtýynsha, ol akterge 2023 jyldyń 30 qyrkúıegi men 12 qazany aralyǵynda árqaısysy 100 mıllıgramm ketamınniń 20 ampýlasyn, sondaı-aq ketamın dárileri men shprıtster satqan.

Eske sala ketsek, amerıkalyq akter Mettıý Perrı 2023 jyldyń qazan aıynda 54 jasynda ómirden ótti. 

Keıin akterdiń ketamın áserinen djakýzıge batyp qaıtys bolǵany belgili boldy.