Metrologııa talaptaryn buzǵany úshin Petropavl 2-JEO úlken mólsherde aıyppul tólemek

PETROPAVL. QazAqparat – Petropavldaǵy 2-JEO tekseristen ótpegen ólsheý quraldaryn paıdalanǵan. Metrologııa talabyn buzǵany úshin endi 2,7 mln teńge aıyppul tólemek, dep habarlaıdy QazAqparat tilshisi QR Tehnıkalyq retteý jáne metrologııa komıteti baspasóz qyzmetine silteme jasap.

«Petropavldaǵy «Sevkazenergo» AQ qaraıtyn 2-Jylý elektr ortalyǵynda tekseristen ótpegen ólsheý quralyn paıdalanǵany anyqtaldy. Keı ólsheý quraldary 4 aıdan artyq tekseristen ótpegen. Olardyń arasynda jylý eseptegish quraldary, dozatorlar, termometrler jáne taǵy basqalary bar», - dep habarlady Komıtettiń baspasóz qyzmeti.

Energetıkalyq kásiporyndarda barlyq tehnologııalyq úderisti – óndiris rejımin, energııany tasymaldaý jáne esepke alýdy baqylaý úshin arnaıy quraldardyń kómegimen túrli kórsetkishterdi ólshep, tirkeý qajet.

Al ólsheý quraldaryn tekserissiz qoldaný QR «Ólshem birligin qamtamasyz etý» Zańyna qaıshy keledi. Bul talapty buzǵandarǵa ákimshilik jaýapkershilik – 1600 AEK – 5 520 000 teńge aıyppul qarastyrylǵan.

Zańbuzýshylyqty joıý týraly Petropavl prokýratýrasynyń usynymy negizinde departament qyzmetkerleri ákimshilik quqyq buzýshylyq jóninde hattama toltyrdy.

Kásiporynnyń óz kinásin moıyndaýyna baılanysty qysqartylǵan óndiristik tártipte aıyppuldyń 50% - 2 760 000 teńgesi tólendi.