Meta Trampqa 25 mıllıon dollar tóleıdi
ASTANA. KAZINFORM – AQSh prezıdenti Donald Tramp Meta (Facebook) jáne Instagram ıesi Mark Tsýkerbergpen eski kıkiljińge baılanysty zańdy kelisimge keldi. Bul týraly Euronews habarlady.
Meta Donald Trampqa AQSh prezıdentiniń áleýmettik jelidegi akkaýnttaryn buǵattaý týraly sot isin retteý úshin 25 mıllıon dollar tóleýge kelisti. Qarajat prezıdenttik kitaphanany qoldaýǵa baǵyttalady.
Meta 2021 jyldyń 6 qańtarynda Kapıtolııdegi tártipsizdikterden keıin Facebook jáne Instagram-daǵy áleýmettik jelilerdegi akkaýnttaryn buǵattap tastaǵany úshin AQSh prezıdenti Donald Tramp kompanııany sotqa bergen, kompanııa onymen zańdy daýdy sheshý úshin 25 mıllıon dollar tóleýge kelisti.
The Wall Street Journal basylymynyń habarlaýynsha, kelisim sharttaryna sáıkes, 22 mıllıon dollar prezıdent kitaphanasynyń qoryna túsedi, al qalǵany sot shyǵyndaryna jumsalady.
Amerıkalyq BAQ kompanııa basshysy Mark Tsýkerbergtiń sońǵy ýaqytta óz korporatsııasyn jańa ákimshiliktiń yqtımal soqqysynan qorǵaý úshin Tramppen qarym-qatynasty jaqsartýǵa tyrysyp jatqanyn atap ótti.
Aıta keteıik, Donald Tramp AQSh-ta TikTok-qa tyıym salýdy talap etetin zańnyń oryndalýyn 75 kúnge keıinge qaldyratyn jarlyqqa qol qoıdy.
Sondaı-aq, Demokratııalyq partııanyń bas prokýrorlary AQSh prezıdenti Donald Tramptyń týa bitken azamattyqty alyp tastaý týraly jarlyǵyna baılanysty sotqa shaǵym túsirdi.