Meshit ashanalarynyń qyzmet aqysynan kim salyq tóleıdi

ASTANA. QazAqparat – Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly ortalyq kommýnıkatsııalar qyzmetinde ótken brıfıngide meshit ashanalarynyń qyzmet aqysynan kim salyq tóleıtinin aıtty, dep habarlaıdy QazAqparat tilshisi.

Meshit janyndaǵy ashanalarda qudaıy astar ótkizilgeni úshin turǵyndar aqy tóleıdi. Onyń salyǵyn meshitter qalaı tólep otyr», - dep surady BAQ ókili.

Bas múftı munyń bári zańmen rettelgenin atady.

«Keıbir meshitterdiń janynda ashanalary bar. Bul ashanalardy meshitter jeke kásipker sııaqty túrli formadaǵy mekemelerge jalǵa beredi. Olar ashanany paıdalanǵany úshin meshitke aqsha tóleıdi. Meshit sol qarajattan ımamdardyń jalaqysyn, sý men jylýdyń aqysyn tóleıdi. Al meshitten jaldap alǵan ashanalardyń ıeleri salyqty ózderi tóleıdi. Memlekettiń ókiletti organdary olardyń jumysyn qadaǵalaıdy. Bizdiń jumys – meshittiń ashanasy bolsa, olardy padalanatyn kisilerge qyzmet kórsetýge jalǵa berý», - dedi Bas múftı.