Merzimdi áskerı qyzmettegi azamattar endi kredıt ala almaıdy
ASTANA. KAZINFORM — Qarjy naryǵyn retteý jáne damytý agenttigi merzimdi áskerı qyzmetke shaqyrylǵan azamattar týraly málimettermen almasý qaǵıdalaryn bekitý jónindegi qaýly jobasyn qoǵamdyq talqylaýǵa shyǵardy.
Qujatta Qorǵanys mınıstrligi men kredıttik bıýrolar arasynda aqparat almasý tártibi aıqyndalyp, bul tetik áskerı qyzmet ótkerý kezeńinde qaryzdar boıynsha tólemdi keıinge qaldyrýdy usyný jáne jeke tulǵanyń kredıttik esebinde tıisti mártebeni kórsetý maqsatynda júzege asyrylatyny kórsetilgen.
— Jobada bankter men mıkroqarjy uıymdarynyń shaqyrý jasyndaǵy jeke tulǵanyń kredıt alý jónindegi ótinimi túsken kezde onyń kredıttik esebindegi mártebesin tekserý qajettiligi kózdelgen. Eger kredıttik esepte jeke tulǵanyń merzimdi áskerı qyzmetti ótkerýi týraly málimetter bolsa, bankter men mıkroqarjy uıymdary kredıt berý týraly ótinimdi qabyldamaıdy, — delingen qoǵamdyq talqylaýǵa shyǵarylǵan qaýly jobasynda.
Ázirleýshi organnyń málimetinshe, atalǵan bastama «Qazaqstan Respýblıkasyndaǵy bankter jáne bank qyzmeti týraly» Zań talaptaryn iske asyrýǵa baǵyttalǵan jáne ony qabyldaý áleýmettik-ekonomıkalyq nemese quqyqtyq teris saldarlarǵa ákelmeıdi.
Eske sala keteıik, byltyr merzimdi áskerılerdiń 9 mlrd teńge nesıesi keıinge shegerilgenin jazǵanbyz.