Merkel táliptermen kelissóz júrgizýdi usyndy

NUR-SULTAN. QazAqparat – Germanııa Federatıvtik respýblıkasynyń kantsleri Angela Merkel Aýǵanstandaǵy «Talıban» radıkaldy qozǵalysymen kelissózdi bastaýdy usyndy. Germanııa mınıstrler kabınetiniń basshysy bul málimdemesin jeksenbi, 5 qyrkúıekte Hagende (Soltústik Reın – Vestfalııa) ótken baspasóz konferentsııasynda jasady, dep habarlaıdy QazAqparat DW-ǵa silteme jasap.

GFR kantsleriniń aıtýynsha, osyndaı dıalog muqtaj aýǵandyqtardy evakýatsııalaý úshin qajet.

«Biz elden, atap ótkende nemistiń damytý uıymdarynda jumys istegen, al endi qaýipti jaǵdaıda qalyp qoıǵan adamdardy shyǵarǵymyz keledi», - dep qosyp ótti Germanııa úkimetiniń basshysy.

Ol osyndaı dıalogtiń Aýǵanstanǵa gýmanıtarlyq kómek jetkizýdi jalǵastyrýǵa múmkindik beretinin atap ótti. Bul rette nemis saıasatkeri Kabýldaǵy Hamıd Karzaı atyndaǵy Halyqaralyq áýejaıdyń jaqynda ushý úshin qaıta ashylǵanyn «jaqsy belgi» dep ataǵan.

«Talıban» radıkaldary GFR-men berik dıplomatııalyq qatynas ornatýǵa nıetti.

GFR-dyń Syrtqy ister mınıstri Haıko Mas (Heiko Maas) buǵan deıin táliptermen kelissózder júrgizýdi qoldaıtynyn jáne olardyń bıligi kezinde belgili bir jaǵdaıda Aýǵanstanǵa qarjylaı kómek kórsetýge bolatynyn málimdedi. Atap ótkende, qarjylaı kómek elde tek tálipterden ǵana emes quralǵan úkimet qalyptassa, adam quqyqtary saqtalsa jáne Aýǵanstan «lańkestik qorǵanyna» aınalmasa ǵana kórsetiledi.

«Bizge unasyn, unamasyn, Aýǵanstanda basqa ómir bastaldy. Endi burynǵy jaralardy jamaıtyn ýaqytymyz joq», - dep málimdedi Mas.

«Talıban» sodyrlary 15 tamyzda Kabýlǵa kirip, al 3 qyrkúıek kúni búkil Aýǵanstandy jaýlap alǵanyn jarııalady. Vashıngton málimetinshe, Aýǵanstandy tálibter jaýlap alǵan kezden beri AUSh jáne onyń jaqtastary elden 122 myńnan astam beıbit turǵyndy shyǵarǵan.