Mereıli otbasylar qurmetke bólendi
QYZYLORDA. KAZINFORM — Halyqaralyq Otbasy kúnine oraı «Otbasy ortalyǵynda» zııaly qaýym ókilderi, «Mereıli otbasy» baıqaýynyń ár jyldardaǵy jeńimpazdary, úlgili jáne jas otbasylar, ÚEU jáne BAQ ókilderi qatysýymen merekeniń mánin aıshyqtaıtyn is-shara uıymdastyryldy.
Memleket basshysy «Halqymyz qaı zamanda da otbasy dástúrin berik ustanyp, qadirleı bilgen. «Úlkenge qurmet, kishige izet – bizdiń qanymyzǵa sińgen qasıet» dep aıryqsha mán berip keledi.
Otbasyndaǵy tálim-tárbıe adamnyń búkil bitim-bolmysyn qalyptastyrady. Aqyldyń keni – aqsaqaldar men tálimniń tetigi – analardan alǵan úlgi-ónegeni ustansaq, isimiz ilgerilep, tirshiligimiz tatymdy bolary anyq.
Іs-sharada oblys ákimi apparatynyń basshysy, áıelder isteri jáne otbasylyq-demografııalyq saıasat jónindegi komıssııa tóraǵasy Shahmardan Baımanov urpaqtar sabaqtastyǵyn jalǵap, qoǵamda eńbek qundylyǵyn nasıhattaǵan otbasylarǵa izgi nıetin jetkizip, aımaq basshysynyń atynan merekemen quttyqtady. Sondaı-aq, dástúrli «Mereıli otbasy» konkýrsyna qujattar qabyldaý búginnen bastalatynyn habarlady.
Baıqaý sharty boıynsha aýdandyq jáne oblystyq komıssııanyń oń sheshimin alǵan otbasylar respýblıkalyq konkýrsqa joldanady.
Merekelik basqosýda sóz alǵan oblystyq ardagerler keńesi tóraǵasynyń orynbasary, qoǵam qaıratkeri Ó.Shámenov jarasymdy otbasylarǵa aq tilegin arnady. Jańadan otaý quryp, shańyraq kótergen juptar uıymdastyrýshylarǵa alǵysyn bildirdi.
Іs-sharaǵa qatysýshylarǵa oblys ákimdigi atynan Alǵys hattar men quttyqtaýlar tabystaldy. Jyl saıyn atap ótiletin Halyqaralyq Otbasy kúninde birlik pen tatýlyq nasıhattalyp, ónegeli otbasylar barshaǵa úlgi etile bermek.
