Mereke qarsańynda 76 elordalyq otbasy baspana aldy
Búgin Astanada 76 otbasy «Nurly jer» memlekettik baǵdarlamasy aıasynda «Qazaqstannyń ıpotekalyq kompanııasy» arqyly satyp alý quqyǵymen jalǵa beriletin páter ıeleri atandy. Turǵyn úıdiń qurylysyna 645,6 mln teńge jumsalǵan. Onyń jalpy kólemi 4 348,9 sharshy metrdi quraıdy. Ár sharshy metriniń quny - 201 120 teńge. Jalǵa alý merzimi - 20 jylǵa deıin. Degenmen, 5 jyldan soń páterdi satyp alý múmkindigi qarastyrylǵan. 
«Búgin mine, Jańa jyl merekesi aldynda elordalyq 76 otbasynyń qýanyshyna ortaqtasyp otyrmyz. Bul baspanalar Elbasynyń tikeleı tapsyrmasymen «Nurly jer» baǵdarlamasynyń aıasynda salyndy. Ózderińiz biletindeı, Astanaǵa óńirlerden kelýshilerdiń sany jyl sanap artýda. Baspanaǵa degen suranys joǵary. Tıisinshe, páter kezeginde turǵandardyń sany da artýda. Bizge berilgen tapsyrma boıynsha aldymen, úı kezeginde turǵan memlekettik jáne bıýdjettik mekeme qyzmetkerlerin turǵyn úımen qamtamasyz etýimiz qajet», - dedi qala ákimi Baqyt Sultanov.
Elorda ákimi jańa baspana ıelerin quttyqtaı otyryp, páter kiltterin tabys etti.
«Men 2001 jyldan bastap bıýdjettik qyzmetker retinde, ıaǵnı medıtsına salasynda jumys isteımin. Úı kezegine 2007 jyldan bastap turdym. Memleket tarapynan qarastyrylǵan osyndaı baǵdarlamanyń arqasynda jáne ákimdikte tirkelgen baspana kezegimniń kelýine oraı búgin úıli bolyp jatyrmyn. Árıne, qýanyshymdy aıtyp jetkize almaımyn. Astanada baspanaly bolý ár turǵynnyń armany. Mine bizdiń de kópten kútken armanymyz oryndaldy», - dedi jańa páter ıesi Janar Kóbeshova. 
Elorda ákimdiginiń derekterine súıensek, ústimizdegi jyly «Nurly jer» baǵdarlamasy boıynsha Astanada 720 azamat baspanaly boldy, onyń 410-y úı kezeginde turǵandar. Búginde úı kezeginde turǵandar sany 45 669 adamdy quraıdy jáne bul tizim jyl sanap artýda.
