Merdigerlerge menshikti qurylys tehnıkasynyń bolýy mindetteledi

NUR-SULTAN. QazAqparat – QR Qarjy mınıstri Erulan Jamaýbaev qurylys salasyndaǵy memlekettik satyp alýdy jetildirý usynystaryn aıtty, dep habarlaıdy QazAqparat tilshisi.

«Qurylys jumystaryn oryndaý úshin jetkilikti materıaldyq resýrstary bar merdigerlerdi irikteý maqsatynda menshikti qurylys tehnıkasynyń bolýy týraly mindetti talap belgileý usynylady. Ol úshin mamandandyrylǵan tehnıkanyń biryńǵaı bazasyn qurý josparlanýda. Bul olardyń bar-joǵyn avtomatty túrde tekserýge múmkindik beredi», - dedi mınıstr Úkimet úıinde ótken baspasóz máslıhatynda.

Mınıstrdiń aıtýynsha, mundaı sharalar qurylys jumystaryn oryndaý úshin bazalyq tehnıkasy joq merdigerlerdi irikteýden ótkizbeıdi.

«Budan basqa, memlekettik satyp alýda jáne kvazımemlekettik sektor sýbektileriniń satyp alýynda qurylys jumystaryn qosalqy merdigerlikke zańsyz berýdi shekteý maqsatynda qosalqy merdigerlerge jumystar shekti kóleminen asqan kezde jáne tapsyrys berýshimen kelisilmegen qosalqy merdigerlerdi tartý kezinde Satyp alý týraly shartty buzý múmkindigi qarastyrylady», - dedi E. Jamaýbaev.

Aıta keteıik, keshe Prezıdent Qasym-Jomart Toqaev Úkimetke jol qurylysyna qajetti resýrstardy óndirý jáne tutyný barysyn muqııat saralaý tapsyrǵan edi.