Menıngıtke shaldyqqan 4 naýqas emderin jalǵastyrýda - Densaýlyq saqtaý mınıstrligi
Vedomstvonyń baspasóz qyzmeti aýrýhanalarda menıngokokk ınfektsııasyna shaldyqqan 7 adam em-dom qabyldap jatqanyn habarlaǵan bolatyn.
Keshki saǵat 18:00-degi jaǵdaı boıynsha, úsh naýqas úılerine jiberilip, statsıonarda 4 adam qalǵan.
Jalpy Qazaqstanda jyl basynan beri menıngokokk ınfektsııasynyń 62 jaǵdaıy tirkelgen, onyń 13-i ólimmen aıaqtalǵan. 45 adam em-domnan keıin úılerine shyǵarylǵan.
Menıngokokqa shaldyqqan Almaty qalasynda - 6 adam, Almaty oblysynda - 3 adam, Ońtústik Qazaqstan oblysynda - 3 jáne Qyzylorda oblysynda 1 adam kóz jumdy.
«Epıdemııaǵa qarsy is-sharalar jalǵasýda. Jańa jaǵdaılar tirkelgen joq», - delingen mınıstrlik aqparatynda.
Menıngokokk ınfektsııasy - ótkir ınfektsııaly aýrý. Ol bakterııalar arqyly taraıdy jáne onyń túrli klınıkalyq kórinisteri bolady. Infektsııany negizinen naýqas adamdar men ózge de tiri tirshilik ıeleri taratady. Olardyń barlyǵynda klınıkalyq belgiler bolmaýy múmkin. Soǵan qaramastan olar menıngokokk ınfektsııasyn taratýshylar bolyp tabylady. Bul indet túri ádette qys jáne kúz mezgilinde kóp taraıdy.
Infektsııa jótel, túshkirý, áńgimelesý barysynda taraıdy. Infektsııa qozdyrýshylar ádette syrtqy ortada turaqsyz keledi. Mıkrob aýrý adammen uzaq ýaqyt ári jaqyn baılanysty bolǵan kezde joǵarǵy tynys alý joldaryndaǵy shyrysh qabaty arqyly keledi. Infektsııa juqtyryp, aýrýǵa shaldyqqanǵa deıingi merzim 1-den 10 kúnge deıingi aralyqty quraıdy. Naýqas adam aýrý juqtyrǵan alǵashqy kúnnen bastap-aq qaýip týdyrady.
Bul aýrýmen ádette 5 jasqa deıingi balalar jıi aýyrady. Óıtkeni olardyń ımmýndy júıesi tolyq qalyptaspaǵan. Al jasóspirimder men jastar ádette kóp ýaqyttaryn túngi klýbtar sııaqty halyq kop shoǵyrlanǵan jerlerde ótkizedi. Al mundaı oryndar men ondaǵy shylym shegý, bir ydystan sýsyn ishý sııaqty jáıtter aýrýdy juqtyrý qaýpin arttyra túsedi.
Menıngıt birden bastalady. Aldymen adamnyń basy qatty aýyryp, júregi aınyp, 6-15 saǵattan soń denesi bórte bastaıdy. Dene qyzýy 39-40°S gradýsqa jetip, qaltyraıdy. Terisi bozaryp, álsireıdi, arqasy men qol-aıaǵynyń ushtary aýyra bastaıdy. Aýrý adam shóldep, asqa degen tábeti bolmaıdy. Sondaı-aq bul aýrý tumaý, angına sııaqty aýrýlarǵa uqsap, bilinbeı jeńil ótýi de múmkin. Ádette adam sýyq tıip, aýyryp, qatty sharshaǵan kezde adamnyń organızmi álsireıdi. Mine, osy kezde ınfektsııanyń taraýyna qolaıly jaǵdaı týyndaıdy jáne osy kezde menıgokokk adamnyń mıyna enip, ony qabyndyra túsedi.
Sondaı-aq Densaýlyq saqtaý mınıstrligi aýrýdyń aldyn alý týraly keńesterimen bólisti.
«Túrli mádenı is-sharalarǵa qatysýdy shektep, basseıinder men oıyn alańdaryna saýda ortalyqtaryna barýdy shekteý qajet. Tazalyq saqtap, bólmeni jıi jeldetip, ylǵaldy tazalyq sharalaryn udaıy júrgizip otyrǵan jón. Sondaı-aq profılaktıkalyq maqsatta dárigerge jıi qaralyp otyrǵan durys. Tek qaınatylǵan sý ishken jón»,-deıdi vedomstvo ókilderi.
