Men velosport saıasatyna qatysamyn – A.Vınokýrov
«Astana» komandasyna qatysty sońǵy aqparattar aıasynda áńgime qozǵaǵan ol jýrnalısterdiń kókeıinde júrgen saýaldarǵa jaýap berdi.
- Qazaqstannyń velosport federatsııasynyń prezıdenti Qaırat Kelimbetovpen bolǵan kezdesýde Sizdi «Astana» komandasynyń basshylyǵyna taǵaıyndaý týraly sheshim shyǵarylǵan eken. Odan basqa qandaı máseleler qaraldy?
- Qaırat Negmatuly federatsııa basshylyǵyna kelgen boıda meni «Astana» komandasynyń basshylyǵyna qoıý máselesin kótergen bolatyn. Aıtqandaı, ol óz sózinde turdy. Onymen bolǵan kezdesýde bul basty másele retinde qaraldy. Árıne, men óz qyzmetimdi jalǵastyratynyma qýanyshtymyn. Sebebi, ózimniń sporttyq jolymdy sońǵy «Týr de Frans» jarysynda alǵan jaraqatpen aıaqtaǵym kelmeıdi. Qazaqstannyń velosport federatsııasynyń prezıdentimen bolǵan kezdesýde meniń qyzmetimdi jalǵastyrý týraly sheshim qabyldandy. Endi, biz komandanyń aldaǵy maqsat-mindetterin oılastyratyn bolamyz. Árıne, ázirshe men «Týr de Frans» sııaqty belesterdi alam dep maqsat qoıa almaımyn. Eń birinshi, kelesi kezeńge daıyndalý qajet dep oılaımyn. Odan keıin men bizdiń komandalyq menedjer Djýzeppe Martınelımen birge komanda saıasatyna aralasamyn. Qazirgi kezde Halyqaarlyq velosport federatsııasy «Astana» komandasynyń upaılaryn sanap jatyr. Biz komandany úzdikterdiń alǵashqy 15-tiginde saqtap qalýymyz qajet. Sonda ǵana kelesi kezeńde bizdi basqa da joǵary jarystarǵa shaqyratyn bolady.
- Siz «Týr de Fransta» alǵan jaraqatqa qaramastan Italııanyń «Lombardııa týryna» qatysady ekensiz...
- «Týr de Fransta» alǵan jaraqytymnan keıin «Lombardııa týryna» qatyspaý týraly másele kóterilgen edi. Bul másele áli de óz kúshin joıǵan joq. Jarystyń bastalýyna bir apta qalǵan kezde men, eń birinshi, óz daıyndyǵymdy baıqap kóremin. Árıne, ol jarysta jeńis týraly sóz qozǵaýdyń qajeti joq. Biz ony jaqsy túsinemiz. Kelesi jyl olımpıadalyq jyl bolǵandyqtan, bizge, eń bastysy, búgingi daıyndyqty joǵaltpaý qajet. Qazirgi kezde komandada 4 lıtsenzııa bar. Aldaǵy «Pekın týry» men «Lombardııada» bizdiń jigitter taǵy upaı jınaı alady degen senim bar.
- Siz daıyndyqty bastadyńyz ba?
- Iá, men tamyzdyń aıaq sheninen bastap trenajerda óz daıyndyǵymdy bastadym. Jaraqattan keıin velosıpedke otyrý qıyndaý. Biraq sońǵy bir apta boıy men velosıpedke otyryp, jattyǵatyn boldym. Árıne, buryńǵy daıyndyq deńgeıine jetý áli erte.
- «Tolyq daıyn boldym» dep qashan aıta alasyz?
- Endi, áli ýaqyt bar. Sondyqtan «Lombardııaǵa» deıin barynsha daıyndalyp kóremin. Al negizgi jarystar ótetin qańtar-aqpan aılaryna daıyn bolyp, qandaı da bir jarysta top jarýǵa tyrysamyn. Baǵdarlama boıynsha Avstralııa men Malaızııada ótetin jarystar bar.
- Al «Astana» komandasyn basqarýǵa qanshalyqty daıynmyn dep oılaısyz?
- Men, eń aldymen, Djýzeppe Martınelediń tájirıbesine súıenemin. Óz basym ol kisi meni qoldaıdy dep senemin. Árıne, kelesi jyly qıyn bolady. Sondyqtan búginde qandaı da bir jeńister týraly eshteńe aıta almaımyn. Bálkim, 2013 jyly Kontador «Astana» komandasyna oralady. Onyń qaıta kelýge nıeti bar. «Týr de Franstan» keıin men onymen kezdesken bolatynmyn. Sol kezde ol «Astanaǵa» oralýǵa qarsy emes ekendigin bildirdi. 2012 jylda qıyn bolady, biraq 2013 jyly biz jetekshi velloshabandozdardy tartýǵa tyrysamyz.
- Kelesi kezeńde Sizdiń joldasyńyz Andreı Kashechkın jarys jolyna shyǵa ma?
- Endi, men úshin ony «joldas» dep aıtý qıyn. Biraq búginde ol komandanyń quramynda bolǵannan keıin, onymen til tabysýǵa tyrysamyz. Eń aldymen, Andreı kishkene «jerge túsip», barlyǵymen birdeı daıyndalýy tıis. Sondyqtan eger ol osy talapqa kónetin bolsa, onda barlyq komandanyń oǵan degen kózqarasy ózgeredi dep bilemin. Buǵan deıin ol joǵary jetistikterge jetpese, biraz tabystarǵa qol jetkizdi. Onyń daryny bar. «Men bárin jeńemin!» dep aıǵalaǵannan góri ol únemi jumys isteýi kerek. Jalpy, komandanyń quramy ózgermeıdi. Qazirgi kezde biz 23 jasqa deıingi qosymsha veloshabandozdardy tartý máselesin qarastyrýdamyz.
- «Astana-2» komandasy qashan qurylady?
- Menińshe, «Astana-2» komandasy kelesi jyly qurylady. Qazaqstannyń jas velosportshylary osy qomandanyń quramynda jattyǵýy tıis. Sebebi, birden «Astananyń» negizgi quramynda óner kórsetý qıyn. Sondyqtan jas sportshylar, eń birinshi, «Astana-2»-de daıyndalyp, kásibı tájirıbe jınaqtaǵannan keıin bizdiń qatarymyzǵa qosylýy shart. «Astana-2» ol - mańyzdy ári qajetti joba. Biz demeýshelirmen kezdesip, osyny barynsha túsindirýge tyrysamyz. Bıýdjet jaǵynan bári durys bolsa, biz ekinshi komandany mindetti túrde jasaqtaıtyn bolamyz.
- Qazaqstanda ekinshi Vınokýrov joq pa? Nege biz ony tappaımyz?
- Biz ony izdeıtin bolamyz.
