Men qazaqsha sóıleımin: 19 etnos ókili respýblıkalyq aktsııaǵa qatysty

NUR-SULTAN. QazAqparat – Sh. Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynda «Men qazaqsha sóıleımin» respýblıkalyq aktsııasynyń jeńimpazdary marapattaldy, dep habarlaıdy QazAqparat.

«Men qazaqsha sóıleımin» respýblıkalyq aktsııasy qazaq tiliniń damýyna eleýli úles qosyp júrgen etnos ókilderin biriktirdi.

Osylaısha, búgin aktsııanyń ІІІ kezeńine qatysqan JOO stýdentteri men eresek turǵyndardy marapattaý rásimi ótti.

«Til – mádenıettiń negizgi elementi jáne ult pen onyń birligin qalyptastyrýdyń múltiksiz sharty bolyp sanalady. Qazaq tilin saqtaý jáne damytý memleketimizdiń mádenı saıasatynyń asa mańyzdy mindetin quraıdy. Sizder de memlekettik tildiń saqtalýy men damýyna baǵa jetpes úles qosyp otyrsyzdar», - dedi QR Bilim jáne ǵylym mınıstrligi Til saıasaty komıtetiniń tóraǵasy Ádilbek Qaba marapattaý rásiminde.

QR Táýelsizdiginiń 30 jyldyǵyn merekeleý aıasynda ótkizilgen aktsııaǵa respýblıkanyń 14 óńirinen 171 adam qatysty.

19 etnos ókilderi belgili qazaq aqyndarynyń týǵan el, týǵan jer, ana tili taqyrybyndaǵy jyr jaýharlarynan úzindilerdi mánerlep jatqa oqydy.

Onda óz óleńderin oqyǵan daryndy qatysýshylar da bolǵan.

«Qatysýshylar arasynda orys ultynyń ókilderi basym – 70 qatysýshy. Ózbek, tatar, dúngen, kúrd, nemis, ázerbaıjan ulttarynyń ókilderi de belsendi qatysýshylar qatarynda boldy. Olardyń basym kópshiligi Qostanaı, Jambyl, Túrkistan, Qaraǵandy, Aqtóbe oblystarynan habarlasqan. Barlyq materıaldardy muqııat zerdelegen qazylar alqasynyń sheshimimen Hamıda Sametova (ShQO), Galına Kochetkova (Aqtóbe), Olga Kefer (Aqtóbe), Anna Korchemkına (BQO), Masrýr Adeeva (Shymkent) aktsııa jeńimpazdary bolyp tanyldy», - dep habarlady «Til-Qazyna» ortalyǵynyń baspasóz qyzmeti.

Al yntalandyrý dıplomdarymen Vıktorııa Doroshko (Qostanaı obl), Marııam Tochıeva (Aqmola obl), Kahrabo ıÝldasheva (Nur-Sultan), Anıýta Tregýb (Aqtóbe obl), Anastasııa Gross (ShQO), Indıra Belskaıa (ShQO), Majıt Gerfanov (Qostanaı) jáne Svetlana Tarasova (Nur-Sultan) marapattaldy.

Esterińizge sala keteıik, aktsııanyń 5-8 synyp oqýshylary arasynda ótken І kezeńine 22 etnostan 326 adam qatysty, onyń basym kópshiligi (214 adam) orys ultynyń ókilderi boldy. 9-11 synyp oqýshylary men kolledj stýdentteri arasynda ótken ІІ kezeńge 14 etnostan 213 adam qatysqan.

Endi kelesi kezeń (6 tamyzdan 6 qyrkúıekke deıin) quqyq qorǵaý, ishki ister organdary ókilderiniń arasynda ótedi.

Qatysýshylardyń materıaldary Instagram jelisinde #menqazaqshasóıleımin2021 heshtegimen jarııalanǵan.