«Men qazaqpyn» xalyqaralyq baıqaýy bastaldy

ASTANA. QazAqparat - «Men qazaqpyn» atty xalyqaralyq megajobanyń aıasynda Almaty jáne Mańǵystaý oblystarynda irikteý sharalary bastaldy. Baıqaýdyń negizgi maqsaty - qazaq xalqynyń tól óneri, sonyń ishinde jyr-termeler men kúılerdi búgingi zaman talabyna saı jańartyp, óskeleń urpaqqa jetkizý, dep xabarlaıdy QazAqparat tilshisi.

Joba aıasynda arnaıy top árbir oblysty aralap, qatysýshylardy irikteıdi. Odan ótkender televızııalyq baıqaýǵa joldama alady. Qatysýshylardyń jas ereksheligi  - 18 ben 40 jas aralyǵy. Sondaı-aq saxnaǵa shyǵatyn ónerpazdardyń kıimi qazaqy úlgide ári búgingi zaman talabyna saı bolýy tıis. 

«Búgin Almatydaǵy irikteý týrlary saǵat 11:00-de «Alataý» dástúrli óner ortalyǵynda bastalady. Al Aqtaýda saǵat 14:00-de Mádenıet saraıynda ótedi», - dedi «Qazaqstan» RTRK prodıýsseri Qýanysh Sultanuly QazAqparat tilshisine bergen suxbatynda.

Jobaǵa Qazaqstan azamattarynan bólek, Reseı, Qytaı men Mońǵolııa jerinde turatyn qandastarymyz da qatysa alady. Atap aıtqanda, Altaı respýblıkasynyń Qosaǵash aýdanynda irikteý týrlary ótkiziledi. Budan bólek,  Baıan-Ólgeı men Shyńjań-Uıǵyr avtonomııalyq ólkesinde irikteýler uıymdastyrylady. Ol jaqtaǵy sharalar shilde aıynda bastalady.

Aıta keteıik, ótken aıda «Men qazaqpyn» xalyqaralyq baıqaýyna arnalǵan baspasóz máslıxaty uıymdastyrylǵan bolatyn. Sol jerde uıymdastyrýshylary baıqaýdyń alǵashqy irikteý týrlarynyń 5 maýsymda bastalatynyn jarııalaǵan.

Osydan keıin kórermen qaýym baıqaýdyń kúndeligi men negizgi konkýrsyn teledıdardan kóre alady. Jeńimpazdar «Jyldyń eń úzdik dástúrli ánshisi», «Jyldyń eń úzdik termeshisi» jáne «Jyldyń eń úzdik kúıshisi» atalymdary boıynsha marapattalady.

«Elbasy rýxanı jańǵyrý jónindegi jalpyulttyq ıdeıany jarııalaǵanda jańǵyrý úderisi mindetti túrde eldiń ulttyq rýxanı tamyrynan nár alýy tıis ekenin atap ótken bolatyn. Bizdiń rýxanı tamyrymyz - ata-babadan mıras bolyp qalǵan saltymyz, tilimiz ben mýzykamyz, ádebıetimiz desek, sonyń ishinde dástúrli ánshilik, kúıshilik jáne termeshilik ónerdiń orny erekshe. Osy biregeı ónerdi laıyqty dáripteý - eldik, birlik ıdeıasyn iske asyrýdyń asa utymdy quraly. Osyny eskere otyryp, biz, mınıstrlik pen «Qazaqstan» ulttyq arnasy, «Men qazaqpyn» atty televızııalyq megajobany usynyp otyrmyz. Jobanyń maqsaty - dástúrli ánshi, termeshi men kúıshilerimizdi, elimizdiń árbir aımaǵynda qalyptasqan óner mektebiniń ókilderin keńinen dáripteý, tańdaýly týyndylardy óskeleń urpaqqa zamanaýı formatta nasıxattaý», - deıdi QR Aqparat jáne kommýnıkatsııalar mınıstri Dáýren Abaev.