Urlap áketip, qujattarǵa qol qoıýǵa májbúrledi: shymkenttik jalǵyzbasty ana vıdeoúndeý jarııalady

ShYMKENT. KAZINFORM - Áleýmettik jelilerde ózin jalǵyzbasty ana retinde tanystyrǵan áıeldiń vıdeoúndeýi tarady.

Vıdeojazbada, jalǵyzbasty anany belgisiz adamdar Shymkent qalasyndaǵy «Komek Center» ortalyǵyna kúshtep ákelip, shamamen on kún boıy erkinen tys ustaǵan. Onyń sózine sensek, ortalyqta qol-aıaǵyn baılap, belgisiz dári salǵan jáne qujattarǵa qol qoıýǵa májbúrlegen.

Atalǵan oqıǵa boıynsha Shymkent qalalyq polıtsııa departamenti qylmystyq is qozǵalǵanyn rastady. Qazirgi tańda tergeý amaldary júrgizip jatyr.

— Oqıǵanyń barlyq mán-jaıyn anyqtaý, sondaı-aq quqyqqa qarsy áreketterge qatysy bar adamdardy belgileý úshin keshendi tergeý sharalary qolǵa alyndy. Ortalyqtyń qyzmeti tekserilip, qujattar men beınejazbalarǵa saraptama júrgizilip jatyr. Tergeý zań talaptaryna saı jan-jaqty ári obektıvti túrde júrgiziledi, — delingen polıtsııa departamentiniń resmı habarlamasynda.

Aıta keteıik, budan buryn Shymkent zoobaǵynda túıequsty tepken er adam izdestirilip jatqanyn jazǵan bolatynbyz.