Men árqashan avtokólikterge jaqyn boldym – Qarqaralyda turatyn kólik boıaýshy áıel
Marjan Ospanova - 51 jasta. Qarqaraly aýdanynyń kóptegen turǵyndary ony avtokólik boıaýshy retinde biledi. 17 jyldan astam ýaqyt boıy ol kólikterdi qalpyna keltirýmen aınalysady. Bastapqyda aýdanda eń jaqsy avtomobıl sheberi sanalatyn jubaıyna kómektesip, keıinnen bul iske ózi de kirisip ketken.
«Bastapqyda kúıeýimde tapsyrystar kóbeıip ketip, qoly tımeı qalǵan kezderinde kómekshi retinde sheberhanasynda júretinmin. Men oǵan qural-saımandaryn berip turatynmyn. Qazir men onymen birge kólikti qalpyna keltirýmen aınalysamyn. Ol dánekerleıdi jáne kóliktiń maıysyp qalǵan jerlerin túzetedi, al men ony boıaımyn jáne tegisteımin. Jumysym keremet aýyr dep aıtpas edim. Iá, keıde aýyr bólshekterdi kóterýge týra keledi. Biraq bul sonshalyqty qıyn emes», - deıdi Marjan.
Marjan úlken otbasynda ósken, olar 8 aǵaıyndy. Ol ortanshy qyzy bolǵandyqtan, negizinen eki úlken aǵasy men inisine kómektesken eken. Bala kezinen kólikterge jaqyn bolǵanyn aıtady.
«Ákem shopan boldy. Bizdiń úıde óz kóligimiz boldy. Men bala kezimnen onyń mashınasyn aınalyp, janynan shyqpaıtynmyn. Kólik júrgizýdi erte úırendim. Men árqashan kóliktiń bólshekterine, oǵan qatysty barlyq nársege qyzyǵýshylyq tanytatynmyn», - dep eske alady Marjan.
Avtokólikterge degen qushtarlyǵyna qaramastan, Marjan eseıe kele tiginshi mamandyǵyn oqyǵan. Uzaq jyldar boıy Qaraqaraly aýdanynyń Kırov tigin fabrıkasynda jumys istegen. Sodan keıin zaýyt jabylǵan kezde ol aýrýhanaǵa sharýashylyq medbıkesi bolyp jumysqa ornalasqan. Biraq árqashan júregim kólikke buryp turatyn deıdi.
«Meniń jubaıym Talǵatbek ómir boıy mashınalardy jóndeýmen aınalyp keledi. Qıyn kezderde oǵan kómektesýge týra keldi. Qalaı bolǵanda da, bul jumysqa birtindep úırendim. Sodan keıin aýrýhanada jumysymnan ketip, kúıeýimniń avtokólik sheberhanasynda jumys isteı bastadym. Qazir ol ekeýmiz bir-birimizge, jumysymyzǵa tóselip alǵanymyz sonshalyq, keıde oǵan aıtqyzaı-aq qajetti bólshekter men saımandaryn berip turamyn. Ol kóliktiń maıysqan jerlerin ornyna keltirýin aıaqtaǵannan keıin men boıaýǵa, sodan keıin tegisteýge kirisemin», - deıdi Marjan.
Bir kólikti jóndeýge erli-zaıypty sheberler 2-3 kúnnen bir aptaǵa deıin ýaqyt jumsaıdy. Marjan jańa klıentter aldymen senimsizdikpen qaraıdy, biraq sodan keıin jumysyma tańdanady deıdi. Olardyń jubaıymen birge búkil aýdan boıynsha 100-den astam turaqty klıentteri bar.
«Basynda er adamdar maǵan temir tulparlaryn senip tastaǵylary kelmeıdi. Biraq sodan keıin olar árqashan oralady. Kelesi joly olar kiltterin tastap, esh ýaıymsyz bara beredi. Óıtkeni biz bárin tııanaqty jáne uqypty jasaıtynymyzdy biledi», - deıdi Marjan Ospanova.
Marjan jubaıymen birge 4 bala tirbıelegen. Úsh qyzy boı jetip, turmys qurǵan, uly áli úılenbegen. Qazir olar nemerelerin tárbıelep jatyr. Ana retinde de, oshaq ıesi retinde de Marjan óz mindetin oryndaýdy avtokólik sheberhanasyndaǵy jumysymen birge alyp júrip keledi. Ol ózi aıtqandaı, kóz – qorqaq, qol – batyr. Eń bastysy – jumystan taıynbaý kerek. Eger qalasaq, barlyq jumysty isteı alamyz deıdi Marjan.
