Memsaraptama bıýdjettik jobalar qunyn 7,6 trln teńgege tómendetti

ASTANA. KAZINFORM — «Memsaraptama» RMK ótken 3 jyldyń ishinde 1,3 myń bıýdjettik ınvestıtsııalyq joba boıynsha teris qorytyndy berdi. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan. 

— Bıýdjettik ınvestıtsııalyq jobalardyń jobalaý-smetalyq qujattamasyn túzetýge qatysty saýaldaryńyzdy qarap, mynany habarlaımyn. Qoldanystaǵy zańnamaǵa sáıkes jobalarǵa saraptama júrgizgende jobalardyń tehnıkalyq jáne smetalyq bóligine de taldaý jasalady, onda shyǵys pen obektilerdiń qunyn qysqartý eskerilip, ońtaıly sheshimder qabyldanady. 2022-2024 jyldar kezeńinde «Memsaraptama» RMK málimdelgen quny 56,6 trln teńge bolatyn 9,7 myń joba boıynsha saraptama júrgizdi. Bul rette usynylatyn quny 49,3 trln teńge bolatyn 8,4 myń joba boıynsha oń qorytyndy (7,6 trln teńgege tómendeý), 1,3 myń joba boıynsha teris qorytyndy berildi. Atalǵan 9,7 myń jobanyń ishinde 2,2 trln teńge somasyna 707 (7,3%) túzetý júrgizildi, — dedi Úkimet basshysy jaýabynda.

Onyń atap ótýinshe, ınflıatsııa, qurylys materıaldary baǵasynyń ósýi, logıstıka qunynyń ulǵaıýy jobalardyń qymbattaýynyń negizgi sebebi boldy. Osyǵan baılanysty jobalardy iske asyrý merziminiń keshiktirilýine jol bermeý maqsatynda 2023 jyly Úkimet zańnamaǵa konkýrstyq rásimder júrgizilmegen jáne qurylys-montaj jumystaryn qarjylandyrý kózdelmegen jobalar boıynsha JSQ (jobalyq-smetalyq qujattama) smetalyq bólimin túzetý múmkindigin kózdeıtin ózgerister engizdi.

— Bul túzetýler jobalyq sheshimderdi ózgertpeı, qurylys bastalǵanǵa deıin JSQ-nyń smetalyq bóligin ózektilendirýge, memlekettik organdardy jobany iske asyrýdyń birinshi jylynda konkýrstyq rásimderdi jarııalaýǵa yntalandyrýǵa jáne qurylys jumystaryn júrgizý barysynda tikeleı qymbattaý táýekelderin azaıtýǵa múmkindik beredi, — dedi Oljas Bektenov.

Buǵan deıin jaqyn arada jalpy quny 3,5 trln teńgeden asatyn 5 iri ınvestıtsııalyq jobany iske asyrý josparlanǵanyn jazǵan edik.