Memorgandardyń halyq aldyndaǵy bedeli qajetti deńgeıde emes – Murat Ábenov
«Qazir tek Qazaqstanda ǵana emes, dúnıejúzinde bolyp jatqan saıası-qoǵamdyq protsess barlyǵyn oılandyrady. Bul, tek bizde emes. Amerıka, Eýropany alyp qaraıtyn bolsaq, azamattyq qoǵamnyń damý deńgeıi óte joǵary jáne burynǵy basqarý júıeleri óz deńgeıinde qyzmet atqaryp jatyr dep aıta almaımyz. Jurt kóshege shyǵyp, ártúrli talaptaryn qoıyp júr. Memlekettik organdar barlyq jaǵdaıda soǵan qajetti sheshimder qabyldap úlgermeı jatqanyn baıqap otyrmyz. Dál osy problemalar bizde de bar. Ony kórip te júrsizder. Ókinishke oraı, memlekettik organdardyń halyq aldyndaǵy bedeli kóp jaǵdaıda qajetti deńgeıde emes. Ózara senim joq»,- dedi Ulttyq qoǵamdyq senim keńesiniń múshesi «Nur Otan» partııasy jaqtastary lıgasynyń qurylýyna oraı ótken baspasóz máslıhatynda
Onyń atap ótýinshe, mundaı problemalardyń týyndaýyna qoǵamdyq baqylaýdyń joqtyǵy jáne halyq kótergen máselelerdiń bıliktiń estimeýi sebep bolyp otyr.
«Al muny kim kóterip, kim aıtýy qajet? Ózderińiz bilesizder, ótken jyly Ulttyq qoǵamdyq senim keńesi quryldy. Onyń birinshi otyrysynda Prezıdent Qasym-Jomart Toqaev «Parlamenttiń mártebesin, bedelin kóterýimiz qajettigin, Parlament halyqtyń únin bılikke jetkizýi kerektigin« aıtty. Sondyqtan halyqtyń únin bılikke jetkizetin Parlament qalyptastyrý qajet», - dedi Murat Ábenov.
Osy oraıda ol «Nur Otan» partııasynda jaqsy ózgerister oryn alyp, ishki tazartý júrgizilip jatqanyna nazar aýdartty.
«Nur Otan» partııasy jańa saılaýda praımerızm arqyly partııaǵa múshe emes azamattardy Parlamentke, jergilikti máslıhatqa usynamyz dep jatyr. Meniń oıymsha, jaqsy ári batyl bastama. Sebebi kóp partııa mundaıdan qorqady. Al «Nur Otan» qazir qoǵamǵa jaqsy belgi berip jatyr. Belsendi bolsańyz – syrtta qalmańyz, «Nur Otan» partııasy sizderge múmkindik beredi«,- dedi ol.
