Memlekettiń kepildigimen qarjylandyrylatyn jobalar tizimi tolyqtyryldy

ASTANA. KAZINFORM – QR Úkimetiniń 2025 jylǵy 4 tamyzdaǵy qaýlysymen memlekettiń kepildikterimen tartylatyn memlekettik emes qaryzdar esebinen qarjylandyrýǵa usynylǵan jobalar tizbesi tolyqty.

2025 jylǵa arnalǵan tizimge jalpy quny 1,5 trln teńgeden asatyn úsh iri jol jobasy engizildi. Atalǵan ınfraqurylymdyq jobalar uzaq merzimge, ıaǵnı 2048 jylǵa deıingi kezeńge josparlanǵan.

Qarjylandyrý usynylǵan jobalar:

 «Jezqazǵan – Qaraǵandy» avtojolynyń (433-946 km) «Qyzylorda – Pavlodar – Ýspenka – RF shekarasy» baǵyty aıasyndaǵy ýchaskesin qaıta jańǵyrtý – 1 171,8 mlrd teńge. Jobany iske asyrý merzimi: 2025-2045 jyldar;

 Saryaǵash qalasynyń aınalma joly men B. Qonysbaev atyndaǵy ótkizý pýnkti arqyly Ózbekstanǵa shyǵatyn jol qurylysy – 237,3 mlrd teńge. Іske asyrý merzimi: 2025-2048 jyldar;

 A-27 «Atyraý – Dossor» avtojolynyń 598-512 shaqyrym aralyǵyndaǵy ýchaskesin qaıta jańǵyrtý – 138,4 mlrd teńge. Jobany júzege asyrý merzimi – 2048 jylǵa deıin.

Úkimet sheshimi aıasynda bul jobalar tıisti memlekettik kepildiktermen qamtamasyz etiledi jáne Qazaqstannyń kólik ınfraqurylymyn jetildirýge baǵyttalǵan.

Buǵan deıin, Respýblıkalyq mańyzy bar KAZ12 «Atyraý – Oral» avtomobıl jolyna ortasha jóndeý jumystaryn júrgizý josparlanyp otyrǵanyn jazǵanbyz.

Sonymen qatar Qaraǵandy oblysynda respýblıkalyq mańyzy bar avtojoldar jóndelip, jol boıyndaǵy servıstik nysandar jańartylýda.