Memlekettik týdy qorlaǵan atyraýlyqtyń biri 15 táýlikke qamaýǵa alyndy

ATYRAÝ. KAZINFORM – Atyraý qalasyndaǵy ákimshilik quqyq buzýshylyqtar jónindegi mamandandyrylǵan sotynda ózge tilde jazýy bar memlekettik týmen fotoǵa túsken úsh adamnyń isi qaraldy.

Sot materıalynda kórsetilgendeı, 3 adamǵa QR Ákimshilik quqyq buzýshylyq týraly kodeksiniń 434-babynyń 1-bóligimen (Usaq buzaqylyq) aıyp taǵylǵan. Onyń biri – jasóspirim. 

– 2025 jylǵy 23 naýryzda azamatshalar N., A. jáne kámelet jasyna tolmaǵan H. Atyraý qalasyndaǵy muz aıdyny ǵımaratynda arab tilindegi jazýy bar Qazaqstan Respýblıkasynyń týymen sýretke túsken. Sýretti áleýmettik jeli arqyly taratyp, usaq buzaqylyq jasaǵan.

Olardyń kinási ákimshilik quqyq buzýyshylyq týraly hattamamen, fotosýretpen, baıanatpen jáne basqa da is materıaldarymen tolyq dáleldendi, -dep habarlady atalǵan sottan.

Sot qaýlysymen quqyq buzýshylar aıyp taǵylǵan bappen kináli dep tanyldy.

– N.-ǵa kámeletke tolmaǵan adamdy ákimshilik quqyq buzýshylyqqa tartý, adamdar tobynyń ákimshilik quqyq buzýshylyq jasaýy sekildi jaýaptylyǵyn aýyrlatatyn mán-jaı eskerilip, 15 táýlikke ákimshilik qamaqqa alý túrindegi ákimshilik jaza qoldanyldy. A.-ǵa ákimshilik jaza retinde 78 myń 640 teńge, kámeletke tolmaǵan H.-nyń zańdy ókiline 39 myń 320 teńge ákimshilik aıyppul salyndy, -dep málim etti sottan.

Sot qaýlylary zańdy kúshine engen joq.

Eske sala ketelik, budan buryn Atyraýda ózge tilde jazylǵan jazýy bar memlekettik týmen fotoǵa túskender ustalǵanyn habarlaǵan bolatynbyz.