Memlekettik satyp alý boıynsha biryńǵaı platforma qurylady
ASTANA. KAZINFORM — Senat «Memlekettik satyp alý týraly» zańdy jáne oǵan ilespe 2 qujatty maquldady.
«Senattyń qaraýyna Memlekettik satyp alý týraly, Qazaqstan Respýblıkasynyń keıbir zańnamalyq aktilerine satyp alý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly, Ákimshilik quqyq buzý týraly kodeksine ózgerister men tolyqtyrýlar engizý týraly zańdar usynylyp otyr. Memlekettik satyp alý týraly zań satyp alynatyn taýarlardyń, jumystar men kórsetiletin qyzmetterdiń sapasyn arttyrýǵa, shamadan tys reglamentteýdi boldyrmaýǵa, satyp alý rásimderin odan ári avtomattandyrýǵa jáne ońaılatýǵa, satyp alý boıynsha biryńǵaı platforma qurýǵa baǵyttalǵan», — dedi zań jobalary týraly baıandama jasaǵan senator Álibek Náýtıev.
Onyń atap ótýinshe, zańda myna novellalar qarastyrylǵan:
— satyp alý rásimderin ońtaılandyrý jáne olardy qaraý merzimin qysqartý;
— shaǵyn jáne orta kásipkerlik sýbektileri úshin memlekettik satyp alý ýákiletti organ bekitetin tártippen jáne kólemderde taýarlardyń, jumystardyń, kórsetiletin qyzmetterdiń tizbesi boıynsha júzege asady;
— bir kózden alý tásilimen ofteık-kelisimshart jasasý múmkindigi;
— memlekettik satyp alýǵa josyqsyz qatysýshylar tizilimindegi zańdy tulǵalardy basqarýǵa, mekemege, jarǵylyq kapıtalyna qatysýǵa baılanysty affılıırlengen kompanııalardyń jáne tulǵalardyń satyp alýǵa qatysýyn shekteý jónindegi sharalardy kúsheıtý.
«Sondaı-aq, obektini jobalaý, salý jáne paıdalanýǵa berýden bastap sol jobany iske asyrýdyń barlyq kezeńderinde bir jetkizýshiniń jaýapkershiligin belgileı otyryp, tolyq daıyn túrinde beriletin qurylys týraly shartyn, ıaǵnı keshendi tolyq daıyn túrinde beriletin qurylysty jasasý kózdeledi. Shaǵyn satyp alýdy jedel júzege asyrý úshin bir kózden 100 aılyq eseptik kórsetkishke deıingi taýarlardy, jumystar men qyzmetterdi 500 aılyq eseptik kórsetkishke deıin, aýdandyq mańyzy bar qalalar, aýyldar, kentter, aýyldyq okrýgter ákimderiniń apparattary úshin taýarlardy, jumystar men qyzmetterdi 4 000 aılyq eseptik kórsetkishke deıin satyp alý múmkindigi kózdelgen. Sonymen qatar, zańda mindettemelerdi tıisinshe oryndaý maqsatynda ónim berýshi qosalqy merdigerlerge beretin jumystar (qyzmetter) kólemin 50-den 30 paıyzǵa deıin qysqartý kózdelgen. Bul rette qosalqy merdigerlerge oryndalatyn jumystardyń nemese kórsetiletin qyzmetterdiń kólemin ózge qosalqy merdigerdiń berýine tyıym salynady», — dedi senator.
Onyń atap ótýinshe, ilespe zańda «Memlekettik satyp alý týraly» negizgi zańǵa sáıkes keltirýge, sondaı-aq normalardyń artyq zańnamalyq reglamenttelýin boldyrmaýǵa baǵyttalǵan Ákimshilik rásimdik-protsestik kodekske jáne Qazaqstan Respýblıkasynyń 17 zańyna ózgerister men tolyqtyrýlar engiziledi.
Atap aıtqanda, Ákimshilik rásimdik-protsestik kodekste memlekettik satyp alý qorytyndylaryn qaraý jáne shaǵymdaný merzimderin qysqartý, sondaı-aq apellıatsııalyq satydaǵy sot qaýlylarynyń zańdy kúshine enýi jáne taǵy basqalary kózdeledi.
«Sondaı-aq, Ákimshilik quqyq buzý týraly kodekske ónim berýshi onymen jasalǵan memlekettik satyp alý týraly shart boıynsha mindettemelerdi oryndamaǵan ne tıisinshe oryndamaǵan jaǵdaıda ónim berýshilerdi memlekettik satyp alýǵa josyqsyz qatysýshy dep taný týraly talappen sotqa júginbegeni nemese ýaqtyly júginbegeni úshin tapsyrys berýshiniń jaýapkershiligin kózdeıtin túzetýler engiziledi», — dedi ol.
