Qazaqstan-Reseı qarym-qatynasy: Kelisimder men birlesken jobalar

MÁSKEÝ. KAZINFORM — Qasym-Jomart Toqaev pen Vladımır Pýtın buqaralyq aqparat quraldaryna birlesken málimdeme jarııalady. Aqorda qol jetkizilgen ýaǵdalastyq pen atqarylyp jatqan jobalardy atap ótti.

Kólik-tranzıt salasy

• Soltústik – Ońtústik», Transkaspıı halyqaralyq kólik baǵdary, «Aıagóz – Baqty», «Dostyq – Moıynty» temirjol jelileri jáne basqa da jobalardyń múmkindigin kezeń-kezeńimen keńeıtýge kelisti. 
• Transshekaralyq logıstıka ınfraqurylymyn jaqsartý, shekaradaǵy ótkizý beketteriniń jumysyn jetildirý mańyzdy ekenin atap ótti.
• «Transaltaı dıalogy» perspektıvti bastamasyn odan ári ilgeriletýge nıetti. Atalǵan format Qazaqstan, Reseı, Qytaı jáne Mońǵolııa arasyndaǵy tatý kórshilik pen ózara tıimdi yntymaqtastyqty keńeıtetin ońtaıly alań bolady.

Energetıka salasy

• Sońǵy jyldary bul baǵytta aıtarlyqtaı progreske qol jetkizildi.
• «Rosatom» kompanııasymen elimizdegi alǵashqy AES qurylysy boıynsha nátıjeli jumys atqarylyp jatyr.
• Taraptar munaı men onyń ónimderin, kómir, elektr energııasyn óndirý, tasymaldaý jáne jetkizý baǵyttaryndaǵy seriktestikti nyǵaıtýǵa kelisti.
• Gaz salasyndaǵy yntymaqtastyq perspektıvasyn, atap aıtqanda, Qazaqstannyń Reseımen shekaralas óńirlerin kógildir otynmen qamtý, sondaı-aq úshinshi elderge tasymaldaý máselelerin egjeı-tegjeıli talqylady. 

Ekonomıkalyq ósimniń jańa baǵyttary

• Sapar aıasynda qol qoıylǵan birqatar qujat elderimizdiń ǵaryshty ıgerý, atom energııasyn, arnaıy ekonomıkalyq aımaqtardy jáne kreatıvti ındýstrııany damytý boıynsha aıtarlyqtaı ilgerileýine múmkindik beredi.
• ІT sektorynyń bolashaǵy zor. Qazaqstannyń bul salada tájirıbesi mol. 

Mádenı-gýmanıtarlyq baılanystar

• Gastrolder, kórmeler, kontsertter men sporttyq jarystar sekildi is-sharalar jıi uıymdastyrylady.
• Jýyrda Máskeýde Qazaqstannyń Reseıdegi mádenıet kúnderi tabysty ótti. Buǵan deıin mádenıet kúnderi aıasynda elimizdiń óner qaıratkerleri ıAkýtııa men Qazanǵa baryp qaıtty.
• Bıyl mamyr aıynda Astanada «Qazaqstan men Reseıdiń máńgilik dostyǵy alleıasy», al keshe Máskeýde «Qazaqstan-Reseı dostyǵy skveri» ashyldy.
• Máskeý kósheleriniń birine Shoqan Ýálıhanovtyń esimi berildi.
• Máskeýde Qazaq aqparattyq-mádenı ortalyǵyn ashý josparlanyp otyr. 

Bilim berý jáne sport

• Qazaqstanda Reseıdiń 9 jetekshi joǵary oqý ornynyń fılıaldary tabysty jumys istep tur.
• Bıyl Máskeý memlekettik halyqaralyq qatynastar ınstıtýtynyń Astanadaǵy fılıaly, ál-Farabı atyndaǵy Qazaq Ulttyq ýnıversıtetiniń Omby qalasyndaǵy fılıaly ashyldy.
• Elimizde Reseıdiń medıtsınalyq joǵary oqý ornynyń ókildigin ashý máselesi pysyqtalyp jatyr.
• Eki eldiń bilim berý standarttary eskerilgen mektepter salý jobasy iske asyrylady.
• Almatyda demeýshilerdiń qoldaýymen reseılik tanymal «Sırıýs» mektebiniń fılıaly ashylady.
• Qazaqstanda orys mádenıeti men tilin ilgeriletýge tıisti nazar aýdarylady. Bul mańyzdy iske elimizdiń bastamasymen qurylǵan Halyqaralyq orys tili uıymy óz úlesin qosyp keledi.

Osydan buryn Memleket basshysy atalǵan sapar eki el arasyndaǵy strategııalyq seriktestik pen odaqtastyq qarym-qatynasty odan ári nyǵaıtý turǵysynan asa mańyzdy dep sanaıtynyn aıtty.

Sonymen qosa Qasym-Jomart Toqaev pen Vladımır Pýtın kelissózder qorytyndysy boıynsha Qazaqstan Respýblıkasy men Reseı Federatsııasynyń memleketaralyq qarym-qatynasyn jan-jaqty strategııalyq seriktestik jáne odaqtastyq deńgeıine deıin jetkizý jónindegi deklaratsııaǵa qol qoıdy.